Londonun mərkəzində fermerlər traktorlarla etiraz aksiyası keçirib
London, 26 noyabr, AZƏRTAC
Bu gün Londonda dövlət büdcəsinin açıqlanmasından öncə fermerlər ailə sahibkarlığına tətbiq edilən vergi islahatları və miras vergisi ilə bağlı etiraz aksiyası keçiriblər.
AZƏRTAC “The Standard”a istinadla xəbər verir ki, etiraz aksiyası paytaxtın mərkəzində ciddi nəqliyyat sıxlığına səbəb olub.
Polis tərəfindən traktorların şəhər mərkəzinə girişinə qoyulan qadağaya baxmayaraq onlarla fermer Vestminsterə traktor karvanı ilə daxil olub. Polis əməkdaşları Vestminster ətrafında təxminən 20 traktorun qarşısını kəsib, lakin digər bir qrup fermer Trafalqar meydanında ondan artıq traktoru park etməyə nail olub.
Parlament binasının qarşısında “Fools vote Labour” (“Axmaqlar Leyboristlərə səs verir”) şüarı yazılmış traktor dayanıb. Fermerlər etirazlarını davamlı traktor siqnalları çalaraq bildiriblər. Səhər saatlarına təsadüf edən aksiya nəticəsində mərkəzi Londonda nəqliyyat demək olar ki, iflic vəziyyətinə düşüb.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
