Lyudmila Bejenaru: Dialoq, əməkdaşlıq və tərəfdaşlıq Azərbaycan-Rumıniya əlaqələrinin əsas parametrləridir
Bakı, 27 noyabr, Günel Türksoy, AZƏRTAC
Bu gün dialoq, əməkdaşlıq və tərəfdaşlıq Azərbaycan ilə Rumıniya arasındakı əlaqələrin əsas parametrləridir. İkitərəfli münasibətlərin möhkəmləndirilməsində mədəni və elmi əlaqələr də mühüm rol oynayır.
Bunu AZƏRTAC-a müsahibəsində Rumıniyanın Yassi Universitetində fəaliyyət göstərən Azərbaycan Multikulturalizm Mərkəzinin sədri Lyudmila Bejenaru deyib.
O, Yassı Universitetində Azərbaycan Multikulturalizm Mərkəzinin fəaliyyətindən, universitetdə “Azərbaycan multikulturalizmi” fənninin tədrisindən bəhs edib. Qeyd edib ki, fənnin tədrisi zamanı Azərbaycanın multikultural mühiti haqqında məlumat verilir, ölkənin UNESCO-nun siyahısına salınmış tarixi yerləri, maddi-mədəniyyət nümunələri barədə tələbələrə mühazirələr oxunur. Mərkəzin fəaliyyətində Qarabağ şəhidlərinə həsr olunmuş tədbirlər, eləcə də Qərbi Azərbaycan həqiqətlərinin beynəlxalq ictimaiyyətə çatdırılması istiqamətində işlər də yer alır. “2017-2023-cü illərdə kursun mühazirələrinə təxminən 100 tələbə qatılıb. Sevindirici haldır ki, həmin tələbələr Azərbaycanda olmasalar da, yalnız yazılı və internet mənbələrindən istifadə edərək təqdirəlayiq işlər hazırlayıblar, hətta şeir forması ilə Azərbaycanı sevdiklərini ifadə ediblər”, - deyə L.Bejenaru bildirib.
Müsahibənin tam variantı gün ərzində AZƏRTAC-da yayımlanacaq.
Bölmənin digər xəbərləri
