Makronun 2026-cı ildə gənclərə təklifi: Yeni könüllü hərbi xidmət
Paris, 27 noyabr, AZƏRTAC
Fransa Prezidenti Emmanuel Makron noyabrın 27-də Varces yaxınlığındakı 27-ci dağ piyada briqadasında (BIM) çıxışı zamanı ölkədə 2026-cı ilin yayından etibarən 18–19 yaşlı gənclərə təklif ediləcək könüllü yeni milli xidmət planının detallarını açıqlayıb.
AZƏRTAC xəbər verir ki, E. Makron yeni xidmətin 10 ay davam edəcəyini bildirib. İlk mərhələdə - 2026-cı ilin yayında təxminən 2000–3000 gənci əhatə edəcək bu xidmətin məqsədi sonrakı illərdə hər il orduya 50 min könüllünün cəlb olunmasıdır.
Makron bildirib ki, bu təşəbbüs həm Fransa ordusunun ehtiyaclarına cavab vermək, həm də gənclərin vətənə xidmət etmək istəyini yaşatmaq üçündür. “Gəncliyimiz xidmətə susayıb və vətən üçün ayağa qalxmağa hazırdır”, - deyə o bildirib.
Yeni sistem Rusiyanın artan təhdidləri fonunda Avropada təhlükəsizlik mühitinin kəskinləşməsi ilə bağlıdır. Hökumət və hərbi rəhbərlik Rusiya ilə mümkün qarşıdurma üçün hazırlıqlara diqqət çəkir və bu yeni xidmətin ordunun ehtiyat qüvvələri bazasını gücləndirməyə yardım edəcəyini bildirir.
Bu yeni könüllü hərbi xidmət Fransada uzun illər sonra ordu və gənclər arasında bağlılığı bərpa etməyə yönəlib. İlk mərhələdə miqyas kiçik olsa da, planın hədəfi 2035-ci ilədək illik 50 min könüllü cəlb etməkdir. Bu addım həm müdafiə qabiliyyətinin möhkəmlənməsi, həm də vətənpərvərlik ruhunun yenidən canlandırılması baxımından strateji əhəmiyyət daşıyır.
Bölmənin digər xəbərləri
