Malini Mehra: Gənclər iqlim müzakirələrinin önündə olmalıdırlar – MÜSAHİBƏ
Bakı, 2 oktyabr, Pərvanə Qafarova, AZƏRTAC
Bakıda keçirilən İqlim Fəaliyyəti Həftəsi regionda iqlim çağırışları və həlləri ətrafında geniş müzakirələrə meydan açır. Tədbirin kuratoru Malini Mehra AZƏRTAC-a məxsusi müsahibəsində builki proqramın əvvəlkindən daha geniş və maraqlı olduğunu vurğulayıb. O, gənclərin prosesdə əsas söz sahibi olduğunu, incəsənət və yaradıcılığın isə iqlim mövzularına yeni yanaşma gətirdiyini qeyd edib.
– Malini xanım, əvvəlcə özünüz və bu tədbirdəki rolunuz haqqında məlumat verməyinizi istərdik...
– Mən Malini Mehrayam, Bakı İqlim Fəaliyyəti Həftəsinin kuratoruyam. Bu rolu ötən ildən daşımaq mənim üçün böyük şərəfdir. Bu isə artıq ikinci Bakı İqlim Fəaliyyəti Həftəsidir, tədbir daha böyük və maraqlıdır.
– İlk dörd gün artıq geridə qalır, tədbir necə keçir?
– Həftənin ilk günlərindən başlayaraq müxtəlif mövzularda maraqlı müzakirələr aparılır. Mən dünən də panellərdə iştirak etdim, sonuncu panel isə iqlim fəaliyyəti sahəsində qadınların liderliyinə həsr olunub. Bu, həftənin ortasında keçirilən çox vacib sessiya idi və insanlara qadınların və qızların iqlim dəyişikliyinə dair həllərin tapılması prosesində mütləq iştirak etməli olduğunu bir daha xatırlatdı.
– Bəs bu günün proqramı nəyi əhatə edir?
– Bu gün artıq dördüncü gündür və gündəmi gənclər götürüb. Enerji keçidi və innovasiyalarla bağlı böyük mövzular müzakirə olunur. Eyni zamanda, incəsənətin davamlılıq və innovasiyadakı roluna da diqqət yetirilir. Heydər Əliyev Mərkəzində çox gözəl sərgi təşkil olunub və bu gün qalibləri müəyyənləşdirəcək peşəkar münsiflər heyəti var. Amma tədbirlər təkcə orada deyil, digər yerlərdə də keçirilir. Məsələn, kənd təsərrüfatına dair dəyirmi masalarda dərin müzakirələr aparılır. Lakin bu günün əsas diqqət mərkəzində gənclərdir - onların müzakirələrə qoşulması, həll yolları irəli sürməsi, qərar qəbul edənləri məlumatlandırması və elə özlərinin də qərarverici mövqedə olmasıdır. Çünki sonda məhz onlar iqlim dəyişikliyinin yaratdığı çətinliklərlə üz-üzə qalacaqlar.
– COP29 ilə müqayisədə bu il hansı yeniliklər var?
– Ötən il COP29-a hazırlıq və məlumatlılıq yaratmaq əsas məqsəd idi. Bu il isə artıq COP29-un irsinin bir parçasıdır. COP29 tarixdə ən yaxşı təşkil olunmuş COP oldu və bir çox qalıcı irslər qoydu. Bakı İqlim Fəaliyyəti Həftəsi də həmin irslərdən biridir. Ümid edirik ki, bu, illik ənənəyə və region üçün iqlim həllərinin əsas mərkəzinə çevriləcək. Azərbaycan yaşıl keçid sahəsində, xüsusən də enerji, kənd təsərrüfatı və su məsələlərində liderlik edir.
– Bu il diqqət çəkilən yeni istiqamətlər hansılardır?
– Bu il yeni sahələrə də diqqət yetiririk. Məsələn, ən yenisi moda və tekstil sahəsidir. Azərbaycan pambıq və ipəyin – çox vacib təbii parça növlərinin böyük istehsalçısıdır. Çox dinamik tekstil sənayesi mövcuddur. Azərbaycanın unikal xüsusiyyəti ondadır ki, uzun beynəlxalq təchizat zəncirlərindən asılı deyil. Bu səbəbdən də Azərbaycanın moda və tekstil dünyasının özünəməxsus cəhətləri var və biz onların davamlı keçidini dünyaya tanıtmaq, təbliğ etmək istəyirik.
– Bu il əvvəlkilərdən fərqli olaraq hansı yanaşmalar tətbiq olunur?
– Fərqli yanaşmalardan biri incəsənət və yaradıcılığın müzakirələrə daxil edilməsidir. Keçən il biz məşhur rəssam və fotojurnalist Rezanın əsərlərindən ibarət möhtəşəm sərgi keçirmişdik və gənclər onun işlərinə öz baxışlarını təqdim etmişdilər. Bu il isə tamamilə gənclərə həsr olunub – onların iqlim çağırışlarını incəsənət və yaradıcılıq vasitəsilə necə şərh etdiklərinə. Buna görə də biz bu il “davamlı innovasiya sərgisi” təşkil etmişik və bunu gənclər hazırlayıblar. Bakı İqlim Fəaliyyəti Həftəsinin gənclər komandası, COP29-un Gənclər üzrə Çempionu Leyla Həsənovanın rəhbərliyi altında bu sərgini özləri təşkil ediblər. Biz onlarla işləməkdən, onların ərsəyə gətirdikləri işlərdən qürur duyuruq və hər kəsi bu gözəl incəsənət əsərlərinə baxmağa dəvət edirik.
Bölmənin digər xəbərləri
