Masallıda direktor ağacların qanunsuz kəsilməsinə yol verdiyinə görə vəzifəsini itirmişdir
Bakı, 1 aprel (AZƏRTAC). Ekologiya və Təbii Sərvətlər Nazirliyinin (ETSN) elektron poçt ünvanına Masallıda ağacların qanunsuz kəsilməsi ilə bağlı şikayət məktubları daxil olmuşdu.
ETSN-dən AZƏRTAC-a verilən məlumata görə, nazirliyin əməkdaşları şikayət məktublarını yerində araşdırmışlar. Masallı Meşə Mühafizəsi və Bərpası Müəssisəsinin 8 saylı dolayının ərazisində 85,73 kubmetrlik 68 müxtəlif növ ağacın qanunsuz yolla kəsilərək aparıldığı aşkar edilmişdir.
Başqa bir şikayətlə bağlı Qəriblər meşəbəyliyinin 2 saylı dolayına baxış keçirilmiş və həmin ərazidə 6,69 kubmetrlik 40 ağacın qanunsuz olaraq kəsildiyi məlum olmuşdur.
Aşkar olunmuş faktlarla əlaqədar müəssisənin direktoru Abuturab Bağırov tutduğu vəzifədən azad olunmuş, meşəbəyi Oktay Tağıyevlə bağlanmış əmək müqaviləsinə xitam verilmiş, meşə gözətçisi Yaşar Məlikov barəsində inzibati tənbeh tədbiri görülmüşdür.
Bölmənin digər xəbərləri
