“Maşını necə gəldi saxlayırlar...” – Avtomobillərin səkilərdə park edilməsi PROBLEMİ VİDEO
Bakı, 28 oktyabr, Günel Türksoy, Səfiyar Məcnun, AZƏRTAC
Bakının bir sıra küçələrində piyada səkilərində saxlanılan avtomobillərə rast gəlmək adi hala çevrilib. Piyadalar üçün nəzərdə tutulan yerlərdə maşınların saxlanılması həm təhlükəsizlik, həm də şəhər mədəniyyəti baxımından narahatlıq doğurur. Səkidə addımlamaq piyadadan bəzən səbir, bəzən də manevr qabiliyyəti tələb edir. Kiminsə tələsdiyini iddia edərək “bir dəqiqəlik” saxladığı maşın piyadaların yolunu kəsir. Səkilərdə uşaq arabası ilə hərəkət edən ana, əlindəki yükləri daşıyan yaşlı qadın, dərsə tələsən tələbə - nəticə etibarilə hər kəs eyni mənzərə ilə qarşılaşır.
AZƏRTAC-ın əməkdaşları bu dəfə paytaxtın Yasamal rayonu ərazisində piyada səkilərini zəbt edən sürücülərlə bağlı reportaj hazırlayıb.
Reportaj zamanı piyadalar avtomobillərin onların hərəkətinə necə maneə yaratması ilə bağlı fikirlərini bölüşüblər. Səkidə park edilmiş maşınların sahiblərini tapa bilmədiyimiz üçün onların mövqeyini öyrənə bilmədik.
“Məcbur olub maşın yoluna çıxırıq”
Piyada N.Həsənov qeyd edib ki, səkilərdə park edilən avtomobillər onların hərəkətinə mane olur, yolu daraldır: “Biz bu vəziyyətdən çox narahatıq. Elə olub ki, səkidə adam çox olub, keçə bilmək üçün avtomobil yoluna çıxmışam. Bu da risklidir. Paytaxtın bir neçə yerində bu cür vəziyyətə rast gəlmək mümkündür. Sürücülərdən xahişimiz odur ki, avtomobillərini piyada səkilərində saxlamasınlar”.
Piyada A.Rzayev də hər gün bu cür hallarla rastlaşdığını, bir sıra hallarda səki ilə yeriməyin mümkünsüz olduğunu deyib: “Biz də məcbur olub maşınların yoluna çıxırıq. Belə olan halda digər sürücüləri də narahat etmiş oluruq. Onlar da istər-istəməz sürəti azaltmalı olurlar. Qəfil əyləci basıb qəza şəraiti yarada bilərlər. Sürücülərə tövsiyə edirik ki, piyada səkilərində maşın saxlamasınlar, biz də rahat yolumuzu gedib-gələk”.
Piyada T.Məmmədova isə bu məsələ ilə bağlı bir qədər fərqli düşünür: “Məncə, sürücülərə binaların altında maşın saxlamaq üçün şərait yaradılsaydı, onlar da piyada səkilərini zəbt etməzdilər. Şərait yoxdur deyə, bu cür vəziyyət alınıb. Hər iki tərəfin də istəklərini nəzərə almaq lazımdır. Bəziləri isə bilərəkdən maşınlarını səkilərin üzərində saxlayırlar. Biz də avtomobil yolundan keçməyə məcbur oluruq. Yaxşı olar ki, imkan olan zaman sürücülər piyadaların hərəkətini də nəzərə alsınlar”.
Yol polisi: Səkilər nəqliyyat vasitələrinin dayanması və durması üçün deyil...
Bakı Şəhər Dövlət Yol Polisi İdarəsinin (DYPİ) Hərəkətin təhlükəsizliyinin təbliği və ictimai qurumlarla əlaqə bölməsinin rəisi, polis mayoru Toğrul Nəsirli AZƏRTAC-a açıqlamasında qeyd edib ki, piyadaların iştirakı ilə baş verən yol-nəqliyyat hadisələrinin səbəblərindən biri də bəzi nəqliyyat vasitəsi sürücülərinin avtomobillərini onların hərəkəti üçün nəzərdə tutulmayan səkidə saxlamasıdır: “Piyadanın hərəkəti zamanı səkidə nəqliyyat vasitəsinin dayanması və durması istər-istəməz onları yolun hərəkət hissəsinə çıxmaq məcburiyyəti ilə qarşı-qarşıya qoyur. Piyada da yolun hərəkət hissəsinə çıxdıqda onun iştirakı ilə baş verə biləcək yol-nəqliyyat hadisəsinə real zəmin yaradılır.
Paytaxtın bütün istiqamətlərində tərəfimizdən bu istiqamətdə tədbirlər həyata keçirilir. Bildiyiniz kimi, səkilərdə nəqliyyat vasitəsinin dayanması və durması qadağandır. Belə hallar aşkarlandığı təqdirdə, həmin sürücü barəsində İnzibati Xətalar Məcəlləsinin 346.9-cu maddəsinə əsasən müvafiq tədbir nəzərdə tutulub. Bir daha sürücülərdən xahiş edirik ki, bu kimi qaydalara ciddi şəkildə əməl etsinlər. Nəzərə almaq lazımdır ki, səkilər nəqliyyat vasitələrinin dayanması və durması üçün deyil, piyadaların rahat və təhlükəsiz hərəkəti üçün nəzərdə tutulub”.
Səkilərdə parklanmaya görə cəza: 60 manat cərimə və iki bal
Nəqliyyat üzrə ekspert Elməddin Muradlı da AZƏRTAC-a səkilərdə parklanmanın paytaxtda ciddi problemlərdən biri olduğunu deyib: “Bakıda hərəkətin təşkili, parklanma yerlərinin məhdud olması ilə bağlı çətinliklər var. Əvvəllər dayanma və durmanın pozulması ilə bağlı 20 manat cərimə mövcud idi. Avtomobillərin səkidə hərəkət etməsinə görə isə 40 manat cərimə yazırdılar. Sonradan qanunda da dəyişikliklər oldu. Hazırda isə səkilərdə parklanmaya görə cəza 60 manat cərimə və iki baldır.
Amma görünən odur ki, paytaxtın bəzi ikinci və üçüncü dərəcəli küçələrində hələ də bu proseslər baş verir. Məsələn, İnşaatçılar prospektində dayanma-durma əks tərəfdə avtobus zolağı olduğu üçün qadağandır. Burada indiyə kimi maşın saxlayan sürücüləri axtarsaq görərik ki, onlar avtomobillərini arxa küçələrdə səkilərdə park ediblər. Çünki həmin maşın sahibləri bu ərazidə işləyirlər. Onlara maşınlarını saxlamaq üçün lazımi şərait yaradılmalıdır.
Ümumiyyətlə, bu məsələdə mücərrədlik də var. Tutaq ki, eni 15 metrlik ərazi hansısa binanın həyətyanı sahəsidir. Həmin yolun neçə metrinin piyada üçün, neçə metrinin avtomobillərin parklanması üçün nəzərdə tutulduğu hələ də aydın deyil. Səkiləri piyadalara qaytarmaq istəyiriksə, avtomobillərin park edilməsi üçün də müəyyən şəraitin yaradılmasına ehtiyac yaranır. İnşaatçılar prospektində çoxlu sayda bina tikilib. Ancaq binaların parklanma yeri yaxşı vəziyyətdə deyil. 200 mənzilli binada 50-60 maşın üçün park yeri yaradılıb. Bu məsələdə binanı tikən sahibkarların da üzərinə ciddi məsuliyyət düşür. Ancaq bu o demək deyil ki, sürücülər maşını piyada səkisində saxlamalıdır. Elə sürücülər var ki, parklanma yerinə 60-70 qəpik ödəməmək üçün maşını necə gəldi saxlayır. Kiminsə həyətinə girib oranı zəbt edir, səkiyə çıxıb piyadanın yolunu kəsir”.
Ən böyük məsuliyyət qanunlardan deyil, ictimai davranış mədəniyyətindən asılıdır
Nəticə etibarilə, hər kəs, o cümlədən sürücülər, piyadalar qanunla öz üzərinə düşən vəzifələri yerinə yetirsələr, şəhər hər kəs üçün təhlükəsiz və rahat olar. Məlumdur ki, qanun pozuntusu kimi qiymətləndirilən bu kimi hallar cərimə ilə nəticələnir. Amma ən böyük məsuliyyət qanunlardan deyil, ictimai davranış mədəniyyətindən asılıdır. Unutmayaq ki, piyada səkisi piyada üçündür.
Bölmənin digər xəbərləri
