Matild Pano: Musəlman qadınlara qarşı hücumlar kifayətdir
Paris, 27 noyabr, AZƏRTAC
Fransa parlamentində noyabrının 24-də təqdim edilən qanun layihəsi yeni müzakirə dalğasına səbəb olub. Bu layihə ilə respublikaçıların deputatı Loran Vokye azyaşlı qızların hicab taxmasını qadağan etmək istəyir.
AZƏRTAC xəbər verir ki, “Əyilməz Fransa” (La France Insoumise – LFI) parlament qrupunun sədri Matild Pano bu təşəbbüsü kəskin şəkildə tənqid edib. O deyib: “Müsəlman qadınlara qarşı davamlı hücumlar artıq kifayətdir – bu ölkədə qadınların geyiminə yönəlmiş hədəfli təzyiqlər xüsusilə artıb. Bu, açıq-aşkar islamofob təbliğatdır və görünür ki, belə siyasi riyakarlıq bəzi dairələrə qazanc gətirir. Lakin bu tamamilə qəbuledilməzdir”.
Pano əlavə edib ki, bu cür təkliflər Fransa cəmiyyətinin birliyinə zərbə vurur və LFI hər zaman bu birliyin qorunmasının tərəfdarı olacaq.
Bu qanun layihəsi ictimai debatlarda həm təqdir, həm də kəskin tənqid doğurub. Layihəyə dəstək verənlər bunu “uşaqların müdafiəsi və sekulyarlıq” baxımından əsaslandırırlar.
Amma tənqidçilər, xüsusilə milli azlıqlar və insan haqları müdafiəçiləri hesab edirlər ki, bu addım müsəlman icmalarını hədəfə alır, din azadlığını məhdudlaşdırır və islamofobiyanı rəsmi siyasət halına gətirmək riski daşıyır.
Bölmənin digər xəbərləri
