MDB ÖLKƏLƏRİ ONKOLOQLARI VƏ RADİOLOQLARININ IV QURULTAYI BAKIDA KEÇİRİLƏCƏK
Təbabətin bu sahəsinin alimlərini ümumi və çox mürəkkəb problemlər birləşdirir ki, onları da birlikdə həll etmək daha asandır. Məhz buna görə də 15 il əvvəl, hələ 1991-ci ildə MDB-nin Onkologiya, Radiologiya və Rentgenologiya Mərkəzləri və İnstitutlarının Direktorları Assosiasiyası yaradılmışdır. Bu, Birlik dövlətlərinin onkoloq alim və həkimlərini birləşdirən beynəlxalq elmi cəmiyyətdir. Assosiasiyanın yaradılması bədxassəli şişlərlə mübarizə sahəsində ənənəvi elmi əlaqələri və əməkdaşlığı qoruyub saxlamaq və möhkəmləndirmək məqsədi daşıyırdı. Onun yaradılmasının təşəbbüskarı isə ötən əsrin böyük alimi, Rusiya Elmlər Akademiyasının və Rusiya Tibb Elmləri Akademiyasının akademiki Nikolay Nikolayeviç Trapeznikov olmuşdur.
Assosiasiya MDB onkoloqları və radioloqlarının üç qurultayını təşkil etmişdir. Həmin qurultaylar MDB və Avropa ölkələrindən, ABŞ-dan görkəmli alimlərin iştirakı ilə Moskvada (1966-cı il), Kiyevdə (2000-ci il) və Minskdə (2004-cü il) yüksək elmi səviyyədə keçirilmişdir.
Onkologiyanın inkişafında xidmətləri nəzərə alınaraq, MDB onkoloqları və radioloqlarının IV qurultayının keçirilməsi respublikamızın mütəxəssislərinə həvalə olunmuşdur.
Qurultayda 16 ölkədən, o cümlədən 11 MDB ölkəsindən, Almaniya, Avstriya, Hindistan, İran və Türkiyədən 1200 alim və həkim iştirak edəcəkdir. Qurultay nümayəndələrinin arasında 21 akademik və 17 müxbir üzv, 246 professor, 278 elmlər doktoru, 25 dosent və 205 elmlər namizədi var.
Qurultayın əsas mövzuları xərçəngin profilaktikası, orqanları qoruyan əməliyyatların keçirilməsinə dair göstəricilərin genişləndirilməsi məsələləridir. Bundan əlavə, qurultayın başlıca mövzuları çərçivəsində onkoloji xəstələrin həyatının keyfiyyəti məsələləri də müzakirə olunacaqdır.
Azərbaycan onkoloqları üçün qarşıdakı qurultayın başqa çox vacib və əlamətdar əhəmiyyəti də var. Bu il onlar üçün yubiley ilidir: Azərbaycan Səhiyyə Nazirliyinin Onkoloji Elmi Mərkəzinin 65 yaşı tamam olur.
Bu qurum, əslində, MDB-nin bütün onkoloji mərkəzləri və institutları, Avropa, Asiya ölkələrinin və ABŞ-ın bir çox onkologiya müəssisələri ilə sıx elmi əlaqələr saxlayır. MDB onkoloqları və radioloqlarının IV qurultayının Bakıda keçirilməsi buna daha bir inandırıcı sübutdur.
Mərkəzin uğurları və nailiyyətlərindən danışarkən qeyd etmək lazımdır ki, bunlar hökumətin və şəxsən Azərbaycan Prezidentinin daimi dəstəyi olmadan əldə edilə bilməzdi. Onkoloji Mərkəzin kollektivi buna görə, habelə qurultayın Bakıda təşkilinə göstərilən köməyə və onun keçirilməsinə yaradılan şəraitə görə, ilk növbədə, dövlətimizin başçısı İlham Əliyevə dərin minnətdarlığını bildirir.
Bölmənin digər xəbərləri
