MDB üzvü olan ölkələrin Hökumət Başçıları Şurasının iclasının yekunları müzakirə edilib
Minsk, 25 noyabr, Zeynal Ağazadə, AZƏRTAC
Noyabrın 25-də Belarus paytaxtında, MDB İcraiyyə Komitəsində Birliyin iştirakçıları olan dövlətlərin bu təşkilatın nizamnamə və digər orqanları yanında Səlahiyyətli Daimi Nümayəndələri Şurasının növbəti iclası keçirilib. Bu barədə AZƏRTAC-a Birliyin Minskdəki qərargahının mətbuat xidmətindən məlumat verilib.
İclasın gündəliyindəki əsas məsələ MDB Hökumət Başçıları Şurasının (HBŞ) noyabrın 21-də Aşqabadda keçirilən iclasının yekunlarının müzakirəsi olub.
İclasda Birliyin iştirakçısı olan bütün dövlətlərin nümayəndələri iştirak edib. Gündəliyə daxil edilmiş bütün məsələlər müzakirə olunub və əməkdaşlığın müxtəlif istiqamətləri üzrə 31 sənəd qəbul edilib.
Azad ticarət zonası haqqında Müqavilənin müddəalarının həyata keçirilməsinin gedişi təhlil edilib, Yerin təkinin kəşfiyyatı, istifadəsi və qorunması üzrə Hökumətlərarası Şuranın fəaliyyətinə qiymət verilib, neft və neft məhsulları bazarlarında rəqabətin vəziyyəti və qiymətyaranma məsələləri müzakirə olunub.
Hökumət Başçıları Şurasının iclasında nəzərdən keçirilən iki ən mühüm məsələ atom energetikası sahəsində əməkdaşlığa həsr edilib. MDB HBŞ-nin iclasında iqtisadi sənədlərlə bərabər, Birlik məkanında humanitar əlaqələrin daha da inkişaf etdirilməsinə və möhkəmləndirilməsinə yönəlmiş bir sıra sənədlər müzakirə olunub. Buraya, ilk növbədə, humanitar əməkdaşlıq sahəsində yaxın iki il üçün Prioritet Tədbirlər Planı, habelə 2020-ci ilə qədər olan dövrdə Birlik iştirakçısı olan dövlətlərin Turizm sahəsində əməkdaşlığının inkişaf etdirilməsi Strategiyasının həyata keçirilməsi üzrə 2015-2017-ci illər üçün Tədbirlər Planı daxildir.
Hökumət Başçıları Şurasının iclasında MDB-nin müqavilə-hüquqi bazasının inventarlaşdırılması məsələlərinə baxılıb.
Daimi Nümayəndələr Şurasının iclasının gündəliyindəki ikinci məsələ çərçivəsində MDB iştirakçıları olan dövlətlərin Turizm Şurasının fəaliyyəti müzakirə edilib. Şuranın sədri, Belarus Respublikası idman və turizm nazirinin müavini Çeslav Şulqa daimi nümayəndələr qarşısında bu barədə ətraflı məlumatla çıxış edib. O qeyd edib ki, Şuranın fəaliyyəti haqda hesabat 2014-cü ilin sonuna təsadüf edir və bu, MDB üzvü olan dövlətlərin liderləri tərəfindən Birlikdə Turizm İli elan edilmiş dövrə müəyyən mənada yekun vurmaq deməkdir.
Ç.Şulqanın fikrincə, 2014-cü ilin Birlikdə Turizm İli elan edilməsi Şuranın fəaliyyətinə güclü təkan verib, bunun sayəsində 2020-ci ilə qədər olan dövrdə Birlik iştirakçısı olan dövlətlərin turizm sahəsində əməkdaşlığının inkişaf etdirilməsi Strategiyası qəbul edilib.
Qeyd edilmişdir ki, turizm ilinin elan edilməsi və Birlik dövlətlərində tematik tədbirlər keçirilməsi təşəbbüsü MDB ölkələrinin vətəndaşları üçün turizm üfüqlərinin genişlənməsinə şərait yaradıb, Birliyin turizm imkanları başqa ölkələrdən olan turistlər üçün daha cəlbedici olub.
Uzunmüddətli sənəd olan bu Strategiya Birlik dövlətlərini sürəkli bir dövr üçün əməkdaşlığa istiqamətləndirir. Bununla əlaqədar, Şura 2015-2017-ci illərdə həmin Strategiyanın həyata keçirilməsinə dair Tədbirlər Planı hazırlayıb və MDB Hökumət BaşçılarI Şurasının bu yaxınlarda Aşqabadda keçirilmiş iclasında həmin plan təsdiq edilib.
MDB iştirakçıları olan dövlətlərin Parlamentlərarası Assambleyasının bu il noyabrın 28-də keçiriləcək plenar iclası bu mövzunun müzakirəsinə həsr ediləcək.
Ç.Şulqa “Mir” Dövlətlərarası Teleradio Şirkəti ilə birlikdə şərti adı “Birliyin möcüzələr dünyası” olan televiziya verilişi yaradılması ideyasını Şuranın fəaliyyətinin yeni istiqaməti kimi təqdim edib. Bu layihənin məqsədi - turizm sahəsinin inkişafı, Birlik ölkələrinin vahid turizm məkanının formalaşması və əhalinin MDB daxilində turizmə marağının stimullaşdırılması üçün MDB iştirakçıları olan dövlətlər tərəfindən göstərilən səylər barədə həm ictimaiyyətin geniş dairələrini, həm də peşəkar birliyi məlumatlandırmaqdır.
Daimi Nümayəndələr Şurasının üzvləri Turizm üzrə Şuranın işini yüksək qiymətləndirərək nəzərdə tutulan planların qeyd-şərtsiz həyata keçirilməsində ona uğurlar arzulayıblar.
Şuranın növbəti iclasını dekabrın 16-da keçirmək nəzərdə tutulur.
Zeynal Ağazadə
AZƏRTAC-ın xüsusi müxbiri
Minsk
Bölmənin digər xəbərləri
