“Mədəni kənd-mədəni mühit” layihəsi çərçivəsində Saatlıda sakinlərlə görüş keçirilib VİDEO
Saatlı, 15 iyul, Aydın Yavərzadə, AZƏRTAC
“Mədəni kənd-mədəni mühit” layihəsi çərçivəsində növbəti görüş Saatlı rayonu Şirinbəy kəndində gerçəkləşib.
AZƏRTAC-ın bölgə müxbiri xəbər verir ki, Sabirabad Regional Mədəniyyət İdarəsi tərəfindən reallaşan “Mədəni kənd - mədəni mühit” layihəsi əsasən ucqar kəndlərdə sakinlərin asudə vaxtının səmərəli keçirilməsinə yönəldilib. Görüşlər Şirvan şəhəri, Hacıqabul, Sabirabad, Saatlı rayonlarını əhatə edir. Növbəti dəfə layihə çərçivəsində Saatlı rayonu Şirinbəy kəndində sakinlərlə görüş keçirilib. Öncə yaradıcı gənclərin əl işlərindən, rəsm əsərlərindən, heykəltəraşlıq nümunələrindən ibarət sərgi nümayiş olunub. Daha sonra təqdim edilən bir-birindən maraqlı rəqslər, mahnılar tamaşaçılar tərəfindən rəğbətlə qarşılanıb.
Sabirabad Regional Mədəniyyət İdarəsinin rəisi Fərid Qurbanzadə tədbirdə çıxış edərək layihə barədə ətraflı məlumat verib. O, kəndlərdə yaradıcı gənclərin aşkar olunması və tanıdılmasının layihənin əsas məqsədlərindən olduğunu tədbir iştirakçılarının diqqətinə çatdırıb. Kənd əhalisində ədəbi-mədəni irsimizə marağın artırılması baxımından belə tədbirlərin kəndlərdə mütəmadi keçirilməsinin vacibliyini qeyd edib.
Kənd sakinləri də tədbiri müsbət qarşılayıb. Uzun müddət müəllim işləyən Cabir Xalidov deyir ki, belə görüşlər Azərbaycanın zəngin mədəni irsinin qorunub saxlanılmasında əhəmiyyətli rola malikdir. “Tarixə baxsaq, Azərbaycan xalqının dərin köklərə söykənən incəsənət tarixi, musiqi aləmi, həmçinin yaradıcılıq işləri özünü büruzə verir. Bu kimi adətlərin gələcək nəsillərə ötürülməsi, qorunub saxlanılması isə əsas vacib şərtlərdəndir. Öz milli-mənəvi dəyərlərinə söykənən bu xalq mədəniyyət aləminə nümunə olduğu kimi, həm də Vətən uğrunda hər zaman düşmənə qarşı döyüşməyi bacarıb. 44 günlük Zəfər yürüşü nəinki düşmənə, həm də bütün dünyaya səs saldı. Qısa müddətdə torpaqlarımız azad olundu və bu kimi tədbirlərin yaxın zamanlarda işğaldan azad edilən rayonlarımızda da keçiriləcəyinə əminik”, - deyə Cabir Xalidov qeyd edib.
Tədbirin sonunda Şirinbəyli kəndində keçirilən Saatlı rayon şəhidlərinin xatirəsinə həsr edilən futbol yarışının qaliblərinə kubok, diplomlar və medallar təqdim olunub.
Bölmənin digər xəbərləri
