Media: Yaxın Şərqdə gərginlik fonunda neftin qiyməti 100 dolları ötüb
Budapeşt, 12 mart, AZƏRTAC
Macarıstanın “İndex.hu” nəşrinin dərc etdiyi məqaləyə görə Yaxın Şərqdə hərbi gərginliyin artması qlobal enerji bazarlarında ciddi təsir yaradıb və neft qiymətlərinin kəskin bahalaşmasına səbəb olub.
AZƏRTAC xəbər verir ki, yazıda ABŞ və İsrailin İran əleyhinə hərbi əməliyyatlarının genişlənməsi nəticəsində regionda enerji və iqtisadi obyektlərə hücumların baş verdiyi bildirilir. Bu vəziyyət qlobal neft təchizatı ilə bağlı narahatlıqları yenidən artırıb. Nəticədə “Brent” markalı xam neftin qiyməti bir barel üçün 100 dolları keçərək təxminən 100,29 dollara yüksəlib.
Məqalədə qeyd olunur ki, regiondakı qarşıdurma həm də dünyanın ən vacib enerji marşrutlarından biri olan Hörmüz boğazı ətrafında vəziyyəti gərginləşdirib. Münaqişə səbəbindən boğaz faktiki olaraq ticarət gəmiləri üçün bağlanıb və bir neçə tanker hücuma məruz qalıb. Bu marşrutdan qlobal neft və qaz tədarükünün təxminən beşdə biri keçir.
Nəşr bildirir ki, bazarlardakı panikanı azaltmaq üçün Beynəlxalq Enerji Agentliyi üzv ölkələrlə birlikdə 400 milyon barel həcmində fövqəladə neft ehtiyatının bazara buraxılması barədə qərar qəbul edib. Bununla yanaşı, ABŞ da strateji ehtiyatlarından 172 milyon barel neftin satışını planlaşdırır.
“İndex.hu” yazır ki, hərbi əməliyyatlar və siyasi bəyanatlar, o cümlədən prezident Donald Tramp tərəfindən əməliyyatların davam etdiriləcəyinə dair açıqlamalar enerji bazarlarında qeyri-müəyyənliyi daha da artırır.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
