Meksika, Peru, Kolumbiya qəzetlərində 20 Yanvar faciəsi haqqında məqalələr dərc edilib
Bakı, 21 yanvar, AZƏRTAC
İyirmi Yanvar faciəsinin ildönümü ilə əlaqədar Meksikanın tanınmış “Milenio” qəzetində Azərbaycanın bu ölkədəki səfiri İlqar Muxtarovun “Qara Yanvar” adlı məqaləsi dərc edilib.
Azərbaycanın Meksikadakı səfirliyindən AZƏRTAC-a bildirilib ki, məqalədə hər il yanvarın 20-nin Azərbaycanda və bütün dünyada azərbaycanlılar tərəfindən milli matəm günü kimi anıldığı qeyd olunub. 1990-cı il yanvarın 19-dan 20-nə keçən gecə sovet ordusunun böyük bir kontingentinin Sovet İttifaqı Kommunist Partiyasının keçmiş baş katibi Mixail Qorbaçovun əmri ilə Bakıya hücum etdiyi, bu hərbi müdaxilə nəticəsində 147 mülki şəxsin öldürüldüyü, yüzlərlə insanın yaralandığı bildirilib.
M.Qorbaçovun orduya göstəriş verərək Bakıda vəziyyəti tam nəzarətə götürmək istədiyi oxucuların diqqətinə çatdırılıb. Bununla yanaşı, məqalədə sovet qoşunlarının 1956-cı ildə Budapeştə və 1968-ci ildə Praqaya daxil olduqları kimi Bakıya da eyni qəddarlıq, azğınlıqla girdiyi qeyd edilib.
Müəllif İkinci Dünya müharibəsində yüz minlərlə qurban vermiş Azərbaycan üçün bu qanlı aktın vahid Sovet İttifaqının və dost sovet xalqları ailəsinin sonu demək olduğunu diqqətə çatdırıb. Nəticədə minlərlə kommunistin öz partiya biletini açıq şəkildə yandırdığını, veteranların öz qəhrəmanlıqları ilə qazandıqları hərbi təltifatlarından imtina etdiklərini və qanlı 20 Yanvar hadisələrindən sonra Sovet İttifaqını tərk etməyin Azərbaycan üçün yalnız vaxt məsələsi olduğunu vurğulayıb.
Həmçinin Qanlı Yanvarın SSRİ-nin sonu üçün bir başlanğıc olduğu və bu hadisələrin müstəqil Azərbaycan Respublikasının yaradılması üçün ölkədə milli azadlıq hərəkatı, digər siyasi proseslərin inkişafına səbəb olduğu oxucuların diqqətinə çatdırılıb.
Faciənin baş verməsindən artıq 26 il keçməsinə baxmayaraq, bu vaxta qədər SSRİ Kommunist Partiyasının rəhbərlərindən heç kimin məsuliyyətə cəlb edilmədiyi bildirilib. Həmçinin azərbaycanlıların müstəqil dövlət qurmaq yolunda həyatlarını qurban verdikləri və bu insanların daim xatirələrdə yaşayacaqları vurğulanıb.
x x x
Azərbaycanın Meksikadakı və eyni zamanda Peru və Kolumbiyadakı səfiri İlqar Muxtarovun Perunun nüfuzlu “El Peruano“ qəzetində “Qara yanvarın xatirəsi”, Kolumbiyanın tanınmış mətbu orqanlarından olan “El Espectador” qəzetində “Azərbaycan müstəqilliyə yol açmış “Qara Yanvar”ı yad edir” sərlövhəli məqalələri də dərc edilib.
“Qara yanvarın xatirəsi” adlı məqalədə 1990-cı il yanvarın 19-dan 20-nə keçən gecə sovet rəhbərliyinin, M.Qorbaçovun göstərişi ilə Bakıya qoşun yeridilməsi, müstəqillik tələbi ilə ayağa qalxmış dinc Azərbaycan əhalisinə amansızcasına divan tutulmasından bəhs edilib, faciənin tarixi-siyasi səbəbləri göstərilib.
Hər il olduğu kimi, Qara Yanvarın 26-cı ildönümündə də faciə qurbanlarının xatirəsinin həm Azərbaycanda, həm bütün dünya azərbaycanlıları tərəfindən ehtiramla yad edildiyini bildirən müəllif müstəqilliyə gedən yolun Azərbaycan xalqı üçün əzabsız və qurbanlarsız başa gəlmədiyini diqqətə çatdırıb.
Bu faciənin hər il yad edilməsinin həm də gələcəkdə dünyanın heç bir yerində belə faciələrin təkrarlanmaması məqsədinə xidmət etdiyi məqalədə vurğulanıb.
“Azərbaycan müstəqilliyə yol açmış “Qara Yanvar”ı yad edir” sərlövhəli məqalədə isə Qanlı Yanvarın 26-cı ildönümü, onun tarixi-siyasi səbəbləri və Azərbaycanın müasir tarixindəki əhəmiyyəti haqqında səfirin fikirlərindən bəhs edilir.
Azərbaycan səfiri Sovet İttifaqı Kommunist Partiyasının birinci katibi M.Qorbaçovun əmri ilə Bakıya yeridilmiş ordunun dinc əhaliyə divan tutaraq bununla əslində kommunist rejimini xilas etməyə və Azərbaycanın müstəqillik hərəkatının qarşısını almağa cəhd etdiyini bildirib.
Məqalədə 20 Yanvarın yalnız faciə və matəm günü olmadığı, eyni zamanda, onun Azərbaycanın müstəqilliyinin bərpası istiqamətində mühüm tarixi hadisə olduğu diqqətə çatdırılıb.
Bölmənin digər xəbərləri
