Azərbaycan Respublikasının Mərkəzi Seçki Komissiyası mayın 26-da Nazirlər Kabineti binasının akt zalında vahid seçicilər siyahısının tərtibi və dəqiqləşdirilməsi məsələsinə həsr olunmuş müşavirə keçirmişdir.

Müşavirəni giriş sözü ilə açan Mərkəzi Seçki Komissiyasının sədri Məzahir Pənahov vahid seçicilər siyahısının dəqiqləşdirilməsi ilə bağlı Azərbaycan Respublikası Seçki Məcəlləsinin tələbini xatırladaraq qeyd etmişdir ki, Mərkəzi Seçki Komissiyası dairə seçki komissiyaları tərəfindən təqdim olunmuş siyahılarla işi başa çatdırmışdır. Mayın 25-də Mərkəzi Seçki Komissiyası həmin məsələ ilə bağlı iclas keçirmiş və Komissiya bu mərhələni başa çatmış hesab etmişdir. Məsələ ilə bağlı Mərkəzi Seçki Komissiyasında geniş müzakirələr aparılmış, MSK üzvləri ölkənin rayonlarına ezam olunmuş və digər zəruri tədbirlər görülmüşdür. Dairə seçki komissiyaları tərəfindən təqdim olunmuş siyahılarda düzəlişlər aparıldıqdan sonra təsdiq edilmiş və müvafiq dairə seçki komissiyalarına qaytarılacaqdır. MSK sədri bu çətin və məsuliyyətli işin öhdəsindən gəldiklərinə görə yerli icra orqanlarına və dairə seçki komissiyalarına razılığını bildirmişdir.

Seçici siyahılarının dəqiqləşdirilməsi prosesinin respublikada ilk dəfə həyata keçirildiyini vurğulayan M.Pənahov qeyd etmişdir ki, bu iş ölkəmizin demokratik dəyərlərə, beynəlxalq standartlara inteqrasiyasının göstəricilərindən biridir. MSK sədri bu işdə Seçki Sistemləri üzrə Beynəlxalq Fondla (İFES) əməkdaşlıq edildiyini müşavirə iştirakçılarının nəzərinə çatdırmışdır.

MSK-nın sədri dairə, eləcə də məntəqə seçki komissiyalarının öz iclaslarında dəqiqləşdirilmə aparılmış seçici siyahılarını təsdiq etmələrinin və bundan sonra da həmin siyahılar üzərində işlərin davam etdirilməsinin, siyahılardakı dəyişikliklər barədə MSK nəzdindəki “Seçkilər” İnformasiya Mərkəzinə məlumat verilməsinin vacibliyini vurğulamışdır. Komissiya sədri hər bir seçicinin yaşadığı ərazidə yerləşən dairə seçki komissiyasında seçici siyahıları ilə tanış olmaq hüququnu xüsusi vurğulamış və dairə seçki komissiyalarının sədrlərinə bu məsələ ilə bağlı seçicilərə şərait yaradılması tapşırığını vermişdir.

Daha sonra dairə seçki komissiyalarının fəaliyyətinin səmərəliliyini artırmaq üçün onların bir sıra problemlərinin həll edildiyini nəzərə çatdıran Mərkəzi Seçki Komissiyasının sədri buna görə ölkə rəhbərliyinə minnətdarlığını bildirmişdir.

Bundan sonra “Seçkilər” İnformasiya Mərkəzinin direktoru İqbal Babayev çıxış etmişdir. O, vahid seçicilər siyahısının tərtib edilməsi ilə bağlı yanvarın 5-də keçirilmiş müşavirədə səsləndirilmiş təklif və iradları nəzərə alaraq vahid informasiya bazasının yaradılması üçün yeni texnologiyanın hazırlanaraq tətbiq olunduğunu qeyd etmişdir.

Seçici siyahılarının dəqiqləşdirilməsi prosesində görülən işlərdən ətraflı danışan İ.Babayev qeyd etmişdir ki, artıq hər bir dairə seçki komissiyasında həmin siyahıların elektron variantı işlənib hazırlanmış və bunların əsasında respublika üzrə vahid seçicilər bazası yaradılmışdır. Hazırda vahid seçicilər bazasında 4.462.772 seçici vardır. Siyahılarda Seçki Məcəlləsinin müddəasına görə, seçkilərə 35 gün qalmış dəqiqləşdirilmə aparılmalıdır. DSK-larda seçici siyahılarının elektron variantının yerləşdiyi kompüterlər modem vasitəsi ilə həm Mərkəzi Seçki Komissiyasına, həm də “Seçkilər” İnformasiya Mərkəzinə birləşdirilmişdir. Nəticədə elektron şəbəkəsi yaranmışdır ki, bu da dairə seçki komissiyalarının seçici siyahılarındakı dəyişikliklər barədə məlumatların mərkəzə operativ çatdırılmasını təmin edir.

Seçicilərin daimi siyahısının tərtibində beynəlxalq təcrübədən də istifadə olunmuşdur. Belə problemlər Avropa Şurasının elektron səsvermə məsələləri üzrə hüquqi və texniki yardım komissiyasında mütəmadi olaraq müzakirə edilir və orada hazırlanan standartlar bu işdə də tətbiq olunur.

Mərkəzi Seçki Komissiyasının üzvü, vahid seçicilər siyahısının dəqiqləşdirilməsi üzrə işçi qrupunun rəhbəri İlham Məmmədov qrupun fəaliyyəti haqqında məlumat vermiş və qeyd etmişdir ki, işçi qrupuna MSK-nın 3 üzvü, pasport qeydiyyatı və statistika orqanlarının əməkdaşları daxildir. İşçi qrupu İFES-lə də yaxından əməkdaşlıq etmişdir.

Məruzələrdən sonra Mərkəzi Seçki Komissiyası sədrinin müavini Svetlana Qasımova, Komissiyanın üzvü Ənvər Əliyev və İFES-in Bakı ofisinin rəhbəri Kristofer Şildz çıxış etmişlər.

Sonda müşavirə iştirakçılarını maraqlandıran suallara cavablar verilmişdir.