Meyvə və tərəvəzlərin dondurulma qaydası
Bakı, 6 oktyabr, AZƏRTAC
Giləmeyvə, bibər, pomidor və digər meyvə-tərəvəzləri soyuducuda donduraraq qışa azuqə hazırlanır və qış uzunu istifadə edilir.
AZƏRTAC xəbər verir ki, Qıda Təhlükəsizliyi İnstitutunun mütəxəssisi Nəzakət Abbasova həmin məhsulların dondurulma qaydası barədə məlumat verərək deyib: “Meyvə və tərəvəzlər ev şəraitində mənfi 10, 16 və 18 dərəcə temperaturda saxlanılır və dondurularkən ilk növbədə saplağından ayrılır. Məsələn, bibərin saplağı yaşıl hissədən təmizlənməli, içərisindən toxumlar çıxarılmalı, bundan sonra bibərləri ya tam iç-içə qoyulmuş şəkildə və yaxud uzunsov və ya kub şəklində doğranılmış halda qablaşdırıb dondurmaq lazımdır.
Dondurmaq üçün seçilən meyvələr tam yetişmiş olmalıdır, lakin istisna hal da ola bilər. Əgər dondurduqdan sonra meyvələri kompot və ya mürəbbə bişirmək üçün istifadə ediləcəksə, onda tam yetişməmiş meyvələrdən də istifadə etmək olar. Xarab və çürük meyvələr isə gözdən qaçmamalıdır”.
Qida mütəxəssisi Məhsəti Hüseynova deyib: “Dondurulacaq meyvə və tərəvəzlərin hər biri saf şəkildə olmalı və donmalıdır, eyni zamanda xarab məhsuldan istifadə edilməməlidir. Meyvə-tərəvəzi dondurarkən sonradan onun donu açılıb istifadə ediləcəksə, onda onu birdəfəlik istehlak üçün ayrı-ayrı miqdarlarda dondurmaq lazımdır. Çünki belə meyvə-tərəvəzi təkrar dondurub açdıqda dondurulduğuna görə həm tərkibinin qida dəyəri aşağı düşür və temperatur rejiminə məruz qaldığına görə mikrobioloji və kimyəvi proseslər gedir”.
Mütəxəssislərin dediyinə görə, digər vacib bir məqam ondan ibarətdir ki, meyvə-tərəvəzləri dondurarkən yumaq məsləhət deyil. Meyvə-tərəvəzləri dondurmamışdan əvvəl onları yuyulmuş halda dondurmağa ehtiyac yoxdur. Bu zaman meyvə-tərəvəzlərin, xüsusilə də giləmeyvələrin məsamələri arasına su daxil olur, onları dondurucuya qoyanda həmin su damcıları buz kristallarına çevrilir. Həmin meyvə-tərəvəzlər istifadədən əvvəl defrost edilən zaman buz kristalları məhsulun yararsız hala düşməsinə səbəb olur.
Qablaşdırma barədə danışan mütəxəssis diqqəti bir məqama da cəlb edib: “Dondurulmuş məhsul əsasən emal olunmuş qazana, şüşə qablara və soyuducuda temperatura davamlı qablara yığılmalıdır. Dondurulan məhsul bir istifadəlik olmalıdır, yəni elə qablaşdırılmalıdır ki, donu açılandan sonra yalnız bir istifadə üçün nəzərdə tutulsun”.
Deməli, müəyyən qaydalara əməl etməklə qida məhsullarını ev şəraitində dondurmaq mümkündür. Lakin ən yaxşısı istehlak olunan hər bir məhsulu təzə halda qəbul etməkdir, yəni hər bir meyvə-tərəvəzi mövsümündə yemək daha məsləhətdir.
Bölmənin digər xəbərləri
