SİYASƏT
Məzahir Əfəndiyev: Azərbaycan bütün platformalarda öz mövqeyini qətiyyətlə müdafiə edir
Bakı, 19 oktyabr, AZƏRTAC
Bu gün Azərbaycan Cənubi Qafqazda yaranmış yeni reallıqları dünya ictimaiyyətinə çatdıraraq bu istiqamətdə çoxvektorlu xarici siyasətdən istifadə etməklə bütün vacib platformalarda öz mövqeyini qətiyyətlə müdafiə edir. Hazırda dünyada davam edən mürəkkəb və gərgin münasibətlər şəraitində Prezident İlham Əliyev dəfələrlə Ermənistanın baş nazirinə sülh sazişinin imzalanmasını təklif etmiş, bu məqsədlə təkcə cari ildə onunla yeddi görüş keçirmişdir.
Oktyabrın 6-da “Avropa siyasi birliyi”nin yeni platforması çərçivəsində Praqada Fransa Prezidenti, Avropa İttifaqı Şurasının prezidenti, Ermənistanın baş naziri və Azərbaycan Prezidentinin iştirakı ilə dördtərəfli görüşün keçirilməsi, bir gün sonra dövlətimizin başçısının Sankt-Peterburqda MDB Dövlət Başçılarının qeyri-rəsmi görüşündə iştirak etməsi, oktyabrın 11-də Qırğız Respublikasına ilk dövlət səfəri, oktyabrın 13-də Astanada keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin 6-cı Zirvə Toplantısının plenar iclasında, oktyabrın 14-də isə Müstəqil Dövlətlər Birliyi Dövlət Başçıları Şurasının iclasında iştirakı və dərin məzmunlu çıxışı Azərbaycan həqiqətlərinin, o cümlədən mövcud vəziyyətin dünya ictimaiyyətinə çatdırılmasının, sülhə çağırışın məntiqi nəticəsi idi.
Bu fikirləri Milli Məclisin deputatı Məzahir Əfəndiyev AZƏRTAC-a açıqlamasında söyləyib.
Deputat bildirib ki, bu çıxışlarda Prezident İlham Əliyev bir daha 28 il ərzində Minsk qrupunun fəaliyyətsizliyini, habelə Azərbaycanın öz torpaqlarının işğaldan azad olunması üçün BMT Nizamnaməsinin 51-ci maddəsini rəhbər tutaraq məsələni həll etməsini, postmüharibə dövründə Ermənistanın dəfələrlə Azərbaycan ərazisinə diversiya qrupları göndərdiyini, terror aktı törətmək cəhdlərini xüsusi vurğulamaqla mövcud platformadan mükəmməl istifadə etdi.
Eyni zamanda, işğaldan azad olunmuş ərazilərdə çoxlu sayda minaların basdırıldığını, İkinci Qarabağ müharibəsi bitdikdən sonra bu günədək 250-dək vətəndaşımızın zərər çəkdiyini xüsusi qeyd etdi, təkcə işğaldan azad olunmuş Laçın rayonunun sərhəd ərazilərində 1400-ə yaxın minanın aşkarlandığını diqqətə çatdırdı. Bildirildi ki, 2020-ci ildə qəbul edilmiş üçtərəfli Bəyanata əsasən Kəlbəcər, Ağdam və Laçın şəhərləri döyüşsüz azad olundu, həmin ərazilər də daxil olmaqla hazırda Qarabağda və Şərqi Zəngəzurda minatəmizləmə prosesi bu gün də həyata keçirilməkdədir.
Məzahir Əfəndiyev Azərbaycanın sülhə doğru bütün çağırışlara həssaslıq nümayiş etdirdiyini söyləyərək deyib: “Avropa İttifaqı və Fransa rəhbərlərinin danışıqlar prosesində yer almaları, eləcə də onların regionda sülhün təmin olunmasındakı maraqları nəzərə alınaraq Azərbaycan müsbət təklifləri də diqqətdə saxlayır. Lakin, bəzi dövlətlərin, xüsusilə də Fransanın əvvəlcə danışıqlar prosesində başqa bir gündəliyi müzakirə etməsi, sonradan isə televiziya vasitəsilə Azərbaycanı işğalda ittiham etməsi siyasi riyakarlıq, habelə bir siyasətçi kimi Makronun Azərbaycan-Fransa münasibətlərinə qarşı etdiyi hörmətsizlikdir”.
“Biz işğal altında olan torpaqlarımızın azad olunmasına Azərbaycan övladlarının qanı və canı bahasına nail olmuşuq və hər hansı bir dövlətin rəhbərinin qəhrəman övladlarımızın, şəhidlərimizin ruhuna hörmətsiz yanaşması yolverilməzdir. Bu gün sözləri və fəaliyyətləri qeyri-adekvat olan, açıq şəkildə beynəlxalq hüquq və prinsiplərə məhəl qoymadan Ermənistana himayədarlıq etməyə çalışan dövlətlər Azərbaycanın müəyyən beynəlxalq konvensiyalar əsasında fəaliyyət göstərən xarici nümayəndəliklərinə təşkil olunmuş basqın və hücumlara susqunluqla yanaşaraq, bir daha dünyada “Mən güclüyəm!” amilini qabardırlar. Hazırda 10 noyabr 2020-ci il tarixində Rusiyanın vasitəçiliyi ilə Rusiya Prezidenti, Azərbaycan Prezidenti və Ermənistanın Baş naziri arasında imzalanmış üçtərəfli bəyanatın doqquz bəndinin də icra olunması əsas məsələlərdən biridir. Eyni zamanda, Ermənistan Avropa İttifaqı ilə keçirilən üçtərəfli görüşlərdə də üzərinə götürdüyü öhdəlikləri yerinə yetirməli və Azərbaycanla sülh sazişini bir daha rasional təhlil edərək tezliklə imzalamalıdır” - deyə M. Əfəndiyev qeyd edib.
Deputat vurğulayıb ki, Prezident İlham Əliyevin beynəlxalq platformalarda səsləndirdiyi kimi, danışıqlar prosesində imzaladığı bütün sənədlərə və həmin sənədlərdə əksini tapmış maddələrin icrasına sadiqdir. Necə ki, ölkəmizdə yaşayan bütün xalqlar multikultural və tolerant mühitdə sülh, əmin-amanlıq, bərabərlik şəraitində yaşayırlar, ermənilər də suveren Azərbaycan ərazisində respublikanın konstitusiyasını rəhbər tutaraq yaşayacaqlar.