Milli Aviasiya Akademiyasında “Fevral məruzələri 2025” beynəlxalq konfransı işə başlayıb VİDEO
Builki konfransa doqquz bölmə üzrə aerokosmik sahənin müxtəlif istiqamətlərinin aktual problemlərinə dair 130-dan çox məruzə təqdim edilib
Bakı, 4 fevral, AZƏRTAC
Fevralın 4-də “Azərbaycan Hava Yolları” QSC-nin Milli Aviasiya Akademiyasında (MAA) Azərbaycan Gəncləri Gününə və ölkəmizin ilk telekommunikasiya peyki “Azerspace 1”in orbitə buraxılması tarixinə həsr olunan “Fevral məruzələri 2025: Aviakosmik məsələlərin həllində gənclərin yaradıcı potensialı” 10-cu beynəlxalq elmi-praktik gənclər konfransı işə başlayıb.
AZƏRTAC xəbər verir ki, konfransa Rusiya, Qazaxıstan, Türkiyə, Ukrayna, Belarus, Almaniya, Böyük Britaniya, Fransa, İsrail və Azərbaycandan olmaqla 20-dən çox elm və təhsil müəssisəsi, o cümlədən 13 universitet, 7 tədqiqat mərkəzi, institut, dövlət qurumları və aparıcı təşkilatları təmsil edən 150-dən çox iştirakçı qatılıb.
Əvvəlcə konfrans iştirakçıları “MAA-nın yaradıcı tələbələrinin innovativ layihələri” adlı sərgi ilə tanış olublar. Sonra “Texnoritm Mərkəzi - MAA-nın innovativlik göstəricisi kimi” mövzusunda təqdimat olub.
Konfransı açan MAA-nın birinci prorektoru professor Ədalət Səmədov MAA-nın rektoru akademik Arif Paşayevin tədbir iştirakçılarına salamlarını və təbrikini çatdırıb.
Qeyd olunub ki, “Fevral məruzələri 2024”dən keçən 1 il ərzində MAA-nın gənc alimləri və tədqiqatçıları Azərbaycanda, eləcə də beynəlxalq miqyasda keçirilən bir sıra tədbirlərdə və layihələrdə, o cümlədən 75-ci Beynəlxalq Astronavtika Konqresində, Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında (COP-29), digər beynəlxalq konfrans və simpoziumlarda uğurla iştirak edib, nüfuzlu jurnallarda məqalələr çap etdirib, beynəlxalq patentlər alıblar.
Builki “Fevral məruzələri”nə doqquz bölmə üzrə aerokosmik sahənin müxtəlif istiqamətlərinin aktual problemlərinə dair 130-dan çox məruzə təqdim edilib.
Elmi müzakirələrlə yanaşı, konfransın proqramında “İT tədrisinin istehsalatla uyğunlaşması problemləri”, “Tətbiqi optoelektronikanın aktual məsələləri”, “Süni intellektin hüquq elmində tətbiqi” mövzularında dəyirmi masalar, həmçinin “Yaşıl logistika” mövzusunda ustad dərsi, eləcə də “Kainat haqqında düşüncələr” (müəllif: Əhəd Canəhmədov) kitabının geniş təqdimatı da nəzərdə tutulub.
Elm və təhsil nazirinin müavini Firudin Qurbanov konfransın əhəmiyyətini vurğulayıb, aviasiya sahəsində əldə olunan uğurlardan danışıb. Qeyd edib ki, hava nəqliyyatı ölkəyə çox böyük gəlirlər gətirir. Aviasiya sahəsində aparılan işlər ölkənin siyasətinin göstəricisidir. Son 20 ildə ölkədə 8 yeni aeroport tikilərək istifadəyə verilib və yenidən qurulub. Bundan sonra yeni aeroportlar Qəbələdə, Zaqatalada, Fizulidə, Zəngilanda və bu il Laçında tikilib istifadəyə veriləcək. Ölkəmiz bu sahədə yeni investisiyalar həyata keçirməyə hazırdır.
Nazir müavini bu sahənin inkişafında gənc kadrların rolunu qeyd edib, bu istiqamətdə MAA-nın fəaliyyətini yüksək qiymətləndirib.
Plenar iclasda Dünya Azərbaycanlı Alimlər Birliyinin sədri Məsud Əfəndiyev “Xaricdə yaşayan azərbaycanlı alimlərın Azərbaycan elm və təhsilinə inteqrasiyası”, Dördüncü Sənaye İnqilabının Təhlili və Koordinasiya Mərkəzinin (4SİM) direktor müavini Soltan Bayramov "Sənaye 4.0 texnologiyaları və aerokosmik sənaye”, Azərbaycan Kibertəhlükəsizlik Təşkilatları Assosiasiyasının İdarə Heyətinin sədri Elvin Balacanov “Kritik informasiya infrastrukturunun təhlükəsizliyinə təhdid yaradan əməllərin kriminallaşdırılması: beynəlxalq və milli hüquqi yanaşma” mövzularında çıxış ediblər.
Konfransın təşkilatçıları MAA, Azərbaycan Respublikası Elm və Təhsil Nazirliyi, Azərbaycan Respublikası Rəqəmsal İnkişaf və Nəqliyyat Nazirliyi, Azərbaycan Respublikasının Kosmik Agentliyi (“Azərkosmos”), “Azərbaycan Hava Yolları” QSC və Azərbaycan Mühəndislik Akademiyasıdır.
“Fevral məruzələri 2025” beynəlxalq konfransı fevralın 6-dək davam edəcək.
Bölmənin digər xəbərləri
