Milli Məclisin deputatları İsraildə Xocalı soyqırımına həsr olunmuş tədbirlərə qatılacaqlar
Bakı, 18 fevral, AZƏRTAC
Milli Məclisin deputatı Sevil Mikayılova Xocalı soyqırımına həsr olunmuş tədbirlərdə iştirak etmək üçün fevralın 19-da İsrailə səfər edəcək.
Parlamentin Mətbuat və ictimaiyyətlə əlaqələr şöbəsindən AZƏRTAC-a bildirilib ki, “Xocalıya ədalət!” kampaniyası çərçivəsində “Azİz” İsrail-Azərbaycan Beynəlxalq Assosiasiyasının təşkilatçılığı ilə keçirilən mərasimlərə İsrail Knessetinin deputatları, şəhər rəhbərliyi, ictimaiyyətin nümayəndələri qatılacaqlar.
Tədbirlərdə Xocalı soyqırımı zamanı həlak olan insanların xatirəsi anılacaq, erməni silahlı birləşmələri tərəfindən azərbaycanlı əhaliyə qarşı törədilən qətliam barədə məlumat veriləcək, faciəni əks etdirən sənədlər təqdim olunacaq.
Səfər çərçivəsində Milli Məclisin deputatı Sevil Mikayılovanın İsrail parlamentində Azərbaycanla dostluq qrupunun üzvləri ilə görüşü nəzərdə tutulub.
Səfər fevralın 23-də başa çatacaq.
Milli Məclisin deputatı Anatoliy Rafailov isə Xocalının Anım Gününə həsr olunmuş dəyirmi masada iştirak etmək üçün fevralın 20-də İsrailin Tel-Əviv şəhərinə səfər edəcək.
Tədbir Bakı Beynəlxalq Multikulturalizm Mərkəzinin İsraildəki nümayəndəliyi və İsraildəki Azərbaycan Evinin təşkilatçılığı ilə həyata keçirilir.
Yığıncaqda Xocalıda baş vermiş qətliamda həlak olan dinc insanların xatirəsi anılacaq, erməni silahlı qüvvələri tərəfindən azərbaycanlılara qarşı törədilmiş soyqırımın tarixi, faciə barədə həqiqətlərin geniş ictimaiyyətə çatdırılması və dünyada təbliği istiqamətində görülən işlər barədə fikir mübadiləsi aparılacaq.
Səfər çərçivəsində, həmçinin Azərbaycanın Vətən müharibəsində möhtəşəm Qələbəsinə həsr olunmuş «Ирс-Наследие» jurnalının ivrit dilində təqdimatı keçiriləcək.
Tədbirlərdə İsrail Knessetinin deputatları, yerli hakimiyyət nümayəndələri, ictimai təşkilatların təmsilçiləri iştirak edəcəklər.
Səfər fevralın 27-də başa çatacaq.
Bölmənin digər xəbərləri
