MİLLİ MƏCLİSİN NÖVBƏDƏNKƏNAR İCLASINDAMƏRKƏZİ SEÇKİ KOMİSSİYASININ YENİ TƏRKİBİ TƏSDİQ EDİLMİŞDİR
Parlamentin sədri demişdir ki, 62 deputat Azərbaycan Respublikası Konstitusiyasının 88–ci maddəsinin 2-ci hissəsini rəhbər tutaraq Milli Məclisin növbədənkənar sessiyasının çağırılması ilə bağlı parlament rəhbərliyinə müraciət etmişdir. İclasın gündəliyinə “Azərbaycan Respublikası Mərkəzi Seçki Komissiyasının üzvlərinin və əvəzedici üzvlərinin seçilməsi haqqında” qərar, eləcə də “Əmək pensiyası haqqında” və “Dövlət sosial müavinətləri haqqında” qanun layihələri daxil olunmuşdur.
Gündəlik təsdiq edildikdən sonra Oqtay Əsədov bildirmişdir ki, “Seçki Məcəlləsinin təsdiq edilməsi və qüvvəyə minməsi haqqında” Qanunun 2-ci maddəsinə əsasən Mərkəzi Seçki Komissiyasının üzvləri Milli Məclis tərəfindən təsdiq olunmalıdır. Milli Məclisə təkrar seçkilərin mayın 13-nə təyin olunduğunu nəzərə alaraq, parlament bu gün MSK-nın yeni tərkibini təsdiqləməlidir. Seçki Məcəlləsinin 24-cü maddəsinə əsasən Mərkəzi Seçki Komissiyasının üzvləri 18 nəfərdən ibarət olmalıdır. Onların 6 nəfəri seçkilərdə çoxluq qazanmış partiya tərəfindən, 6 nəfəri siyasi partiyaya mənsub olmayan müstəqil deputatlar tərəfindən, 6 nəfəri isə Milli Məclisdə azlıq təşkil edən siyasi partiyalar tərəfindən irəli sürülür. Müstəqil deputatlar tərəfindən müəyyən olunmuş üzvlərdən 4 nəfəri birbaşa, bir nəfəri seçkilərdə çoxluq qazanmış partiya ilə, bir nəfəri isə seçkilərdə az yer qazanmış siyasi partiyalar ilə razılaşdırılaraq təyin olunurlar.
Milli Məclisdə təmsil olunan siyasi partiyaların nümayəndələri və digər deputatlarla məsləhətləşmələrdən sonra bu iclasda Mərkəzi Seçki Komissiyasının qismən formalaşdırılması qərara alınmışdır. Hamıya məlumdur ki, 2005-ci il 6 noyabr seçkilərindən sonra Milli Məclisdə 115 deputatın mandatı təsdiq olunmuş, 10 dairədəki seçkilərin nəticələri isə MSK və Konstitusiya Məhkəməsi tərəfindən ləğv edilmişdir.
Bildirilmişdir ki, Milli Məclisdə çoxluq qazanan Yeni Azərbaycan Partiyası 6 nümayəndəsini müəyyən etmiş, 41müstəqil deputatın irəli sürdüyü 5 namizədin 4-ü birbaşa, 1 nəfəri isə çoxluq qazanmış partiya ilə razılaşdırılmışdır. Milli Məclisdə azlıq təşkil edən siyasi partiyalar tam formalaşmadığına görə, onlarla razılaşdırılacaq namizəd may ayında keçiriləcək təkrar seçkilərdən sonra müəyyənləşəcəkdir. Elə bu səbəbdən də Milli Məclisdə azlıq təşkil edən siyasi partiyalar hələlik iki namizədin seçilməsini qərara almışdır. Qalan 4 nəfər də təkrar seçkilərdən sonra bəlli olacaqdır. Parlamentin spikeri vurğulamışdır ki, beləliklə, Milli Məclis bu gün Mərkəzi Seçki Komissiyasının 13 nəfər üzvünü təsdiq edəcəkdir. Bu tərkib MSK-nın fəaliyyəti üçün kifayət qədər yetərlidir. Ona görə ki, azı 12 üzv seçildikdən sonra Mərkəzi Seçki Komissiyası səlahiyyətli olur və fəaliyyətə başlaya bilər.
Sonra Milli Məclisdə çoxluq qazanmış deputatlar adından Yeni Azərbaycan Partiyası sədrinin müavini - icra katibi Əli Əhmədov, müstəqil deputatlar adından Milli Məclis sədrinin müavini Valeh Ələsgərov, azlıq təşkil edən deputatlar adından Azərbaycan Demokratik İslahatlar Siyasi Partiyasının sədri Asim Mollazadə və Vətəndaş Birliyi Partiyasının sədri Sabir Hacıyev Mərkəzi Seçki Komissiyasının üzvlüyünə namizədlərinin adlarını açıqlamışlar.
Səsvermə zamanı siyasi partiyaların və müstəqil deputatların MSK üzvlüyünə təqdim etdiyi 13 nəfərin namizədliyi 87 səs lehinə, 3 əleyhinə və 1 nəfər bitərəf olmaqla təsdiqlənmişdir. Milli Məclis Mərkəzi Seçki Komissiyasının 13 nəfər üzvünün, eləcə də 3 nəfərdən ibarət əvəzedici üzvünün seçilməsi barədə qərar qəbul etmişdir. Əvəzedici heyətə YAP-dan 2 nəfər, müstəqil deputatlar tərəfindən isə 1 nəfər seçilmişdir.
Daha sonra “Əmək pensiyaları haqqında” qanun layihəsi ikinci oxunuşda müzakirə olunmuşdur. Layihənin birinci oxunuş müzakirəsi zamanı 48 deputat çıxış etmiş, çoxlu sayda rəy və təkliflər səsləndirilmişdir. Milli Məclisin daimi komissiyaları layihə üzərində yenidən işləmiş, layihənin müxtəlif maddələrinə 57-yə yaxın dəyişiklik edilmişdir.
Milli Məclisin sosial siyasət daimi komissiyasının sədri Hadi Rəcəbli layihəyə edilmiş əlavə və dəyişikliklər barəsində ətraflı məlumat vermişdir.
O bildirmişdir ki, Azərbaycanda vətəndaşların əmək pensiyası hüquqlarının yaranmasının əsaslarını, bu hüquqların həyata keçirilməsi qaydalarını və əmək pensiyası təminatı sistemini müəyyən edəcək bu qanunun birinci oxunuşu zamanı səslənmiş irad və təkliflərin böyük əksəriyyəti işçi qrupu tərəfindən nəzərə alınmışdır. Bir sıra əlavə və dəyişikliklər edilərək layihə əsaslı surətdə təkmilləşdirilmişdir. Müzakirəyə çıxarılan layihədə əmək pensiyasının baza hissəsinin pensiyaçıların sosial müdafiəsinin dövlət təminatı olması, azı 5 il sığorta stajına malik hipovizqanizm (liliput) xəstəliyinə tutulmuş və mütənasibliyi pozulmuş cırtdanboylu kişilərin 47, qadınların isə 42 yaşa çatdıqda yaşa görə əmək pensiyası almaq hüququ, əmək pensiyalarının artırılması və indeksləşdirilməsi, prokurorluq, məhkəmə sistemində işləmiş şəxslərə yaşa görə pensiyanın təyin olunma mexanizmi və digər müddəalar əksini tapmışdır.
Sonra “Sosial müavinətlər haqqında” qanun layihəsi müzakirə olunmuşdur.
Deputatlar qanun layihələrinin təkmil sənəd olduğunu, ikinci və üçüncü oxunuşun tələblərinə cavab verdiyini bildirmişlər. Hər iki layihə səsə qoyularaq ikinci və üçüncü oxunuşda qəbul edilmişdir.
Azərbaycan Respublikasının dövlət himni səsləndirildikdən sonra Milli Məclisin növbədənkənar iclası işini başa çatdırmışdır.
Bölmənin digər xəbərləri
