MİLLİ MƏCLİSİN NÜMAYƏNDƏ HEYƏTİ TÜRKİYƏDƏ SƏFƏRDƏDİR
Nümayəndə heyətinin tərkibinə deputatlardan Nizami Cəfərov, Məlahət Həsənova, Fərrux Zeynalov, Qənirə Paşayeva, Rövşən Rzayev, Milli Məclis Aparatının rəhbəri Səfa Mirzəyev, aparatın beynəlxalq münasibətlər şöbəsinin müdiri Rəşid İbrahimov və digər şəxslər daxildirlər.
Fevralın 8-də Ankaranın Esenboğa hava limanında nümayəndə heyətimizi Türkiyə Böyük Millət Məclisinin sədr müavini Sadik Yakut, Azərbaycanın Türkiyədəki səfiri Zakir Həşimov və digər rəsmi şəxslər qarşılamışlar.
Nümayəndə heyətinin səfəri Türkiyə Respublikasının banisi Mustafa Kamal Atatürkün dəfn olunduğu məqbərəni - Anıtqəbiri ziyarətlə başladı. Azərbaycan Respublikası Milli Məclisi sədrinin adından məzarın önünə əklil qoyuldu. Milli Məclisin sədri Oqtay Əsədov xatirə kitabına ürək sözlərini yazdıqdan sonra parlament nümayəndə heyətinin üzvləri Atatürk və Qurtuluş Savaşı muzeyi ilə tanış oldular.
Sonra nümayəndə heyəti Türkiyə Böyük Millət Məclisinə gəldi. Burada nümayəndə heyətinin Türkiyə Böyük Millət Məclisinin sədri Bülənd Arınçla görüşü oldu.
Milli Məclisin sədri Oqtay Əsədovu səmimi salamlayan Bülənd Arınç onun dəvətini qəbul etdiyinə və ilk xarici səfərinə Türkiyədən başladığına görə parlamentimizin başçısına minnətdarlığını bildirdi. O qeyd etdi ki, iki dahi şəxsiyyətin - Mustafa Kamal Atatürkün və Heydər Əliyevin dediyi kimi, biz iki qardaş dövlətlərik. Azərbaycan Respublikasının Prezidenti İlham Əliyevin 2004-cü ildə Türkiyəyə səfəri əsası ulu öndər Heydər Əliyev tərəfindən qoyulmuş dostluq və qardaşlıq münasibətlərinə yeni təkan verdi. Bu gün ölkələrimiz siyasi, iqtisadi, elm, təhsil, mədəni və digər sahələrdə, o cümlədən parlamentlər səviyyəsində sıx əməkdaşlıq edir. Biz sevinirik ki, 2005-ci il noyabrın 6-da Azərbaycanda parlament seçkiləri yüksək səviyyədə keçirildi. Türkiyə bu seçkiləri yaxından müşahidə etdi və alqışladı.
Görüşdə qeyd olundu ki, Türkiyə beynəlxalq səviyyədə də daim Azərbaycanı dəstəkləyir və Azərbaycanın ərazi bütövlüyünün bərpası üçün iş görür. İnanırıq ki, bu əməkdaşlıq bundan sonra daha da güclənəcək, Türkiyə-Azərbaycan dostluğunun möhkəmlənməsinə xidmət edəcəkdir.
Milli Məclisin sədri Oqtay Əsədov nümayəndə heyətini öz ölkəsinə dəvət etdiyinə və səmimi qəbula görə minnətdarlıq edərək, parlamentin başçısı kimi ilk olaraq Türkiyəni ziyarətdən qürur duyduğunu dedi. Milli Məclisin sədri bildirdi ki, biz həmişə bütün sahələrdə, o cümlədən Ermənistan-Azərbaycan, Dağlıq Qarabağ münaqişəsinin həlli istiqamətində Türkiyənin dəstəyini və köməyini hiss etməkdəyik. Ölkələrimiz bir sıra beynəlxalq təşkilatlarda, həmçinin Avropa Şurası Parlament Assambleyasında yaxından əməkdaşlıq edir. Bununla yanaşı, Türkiyə və Azərbaycan parlament dostluq qrupları daha fəal olmalı, qarşılıqlı səfərlərin sayı artırılmalıdır. Bu, parlamentlərarası münasibətlərin inkişafına, qarşılıqlı təcrübə mübadiləsinin daha da intensivləşməsinə kömək edəcəkdir.
Görüşdə ölkələrimizin parlamentləri arasında işbirliyi barədə protokolun imzalanmasının və birgə seminarların, konfransların keçirilməsinin vacibliyi vurğulandı.
Sonra parlament sədrləri birgə mətbuat konfransı keçirdilər. Türkiyənin tanınmış kütləvi informasiya vasitələri nümayəndələrinin sualları cavablandırıldı, ölkələrimiz arasında siyasi, iqtisadi, parlamentlərarası əlaqələrin perspektivləri barədə ətraflı məlumat verildi.
Mətbuat konfransından sonra Azərbaycan parlamentinin nümayəndə heyəti Türkiyə Böyük Millət Məclisinin iclasında iştirak etdi.
Tədbirlərdə Milli Məclisin nümayəndə heyətini respublikamızın Türkiyədəki səfiri Zakir Həşimov müşayiət edirdi.
Səfər davam edir.
Bölmənin digər xəbərləri
