Milli Məclisin sədrinə Zəfər Günü münasibətilə təbrik məktubları ünvanlanıb
Bakı, 9 noyabr, AZƏRTAC
8 Noyabr - Zəfər Günü münasibətilə Milli Məclisin sədri Sahibə Qafarovaya təbrik məktubları ünvanlanıb.
Parlamentin Mətbuat və ictimaiyyətlə əlaqələr şöbəsindən AZƏRTAC-a bildirilib ki, Türkiyə Böyük Millət Məclisinin sədri Mustafa Şentop, Pakistan İslam Respublikası Milli Assambleyasının sədri Raca Pərviz Əşrəf, Türk Dövlətləri Parlament Assambleyasının baş katibi Mehmet Süreyya Er və Qara Dəniz İqtisadi Əməkdaşlıq Təşkilatı Parlament Assambleyasının baş katibi Asəf Hacıyevdən daxil olan təbrik məktublarında xalqımızın 44 günlük Vətən müharibəsində şanlı Qələbəsinin ikinci ildönümü münasibətilə Milli Məclisin sədri Sahibə Qafarovaya və onun timsalında parlamentin deputatlarına səmimi təbriklər ünvanlanıb.
Məktublarda Azərbaycan xalqının iradəsi, Müzəffər Ali Baş Komandan Prezident İlham Əliyevin rəhbərliyi və müzəffər Azərbaycan Ordusunun misilsiz şücaəti nəticəsində əldə olunan bu Qələbənin müasir tarixdəki yeri yüksək dəyərləndirilib, Türkiyə və Pakistanın Azərbaycana qardaşlıq və dostluq dəstəyi bir daha ifadə olunub, ölkəmizlə dostluq və əməkdaşlığın, ikitərəfli münasibətlərin daha da inkişaf edəcəyinə əminlik ifadə olunub.
Təbrik məktublarında cəsarət və fədakarlıqları heç bir zaman unudulmayacaq əziz şəhidlərimizə Allahdan rəhmət, qəhrəman qazilərimizə can sağlığı, Azərbaycan xalqına davamlı sülh və firavanlıq arzuları öz əksini tapıb.
Bölmənin digər xəbərləri
