Minlərlə dövlət qulluqçusu Londondan köçürüləcək
London, 14 may, AZƏRTAC
Böyük Britaniya hökuməti xərcləri azaltmaq və dövlət idarələrinin fəaliyyətini paytaxtdan kənarda da təmin etmək məqsədilə minlərlə dövlət qulluqçusunun Londondan köçürülməsini planlaşdırır.
AZƏRTAC “BBC”yə istinadla xəbər verir ki, 2032-ci ilə qədər paytaxt üzrə 12 min vəzifənin ixtisar olunması və 11 dövlət ofisinin bağlanması nəticəsində illik 94 milyon funt sterlinqə qənaət ediləcəyi gözlənilir. Plan çərçivəsində Mançester və Aberdində iki yeni hökumət kompleksi açılacaq, digər şəhər və qəsəbələrdə də iş yerləri yaradılacaq.
İttifaqlar bu addımı ümumilikdə müsbət qarşılasa da, dövlət qulluqçularının dəyişikliklərdən necə təsirlənəcəyi ilə bağlı daha ətraflı məlumat tələb edib.
Nazirlər Kabinetinin nümayəndəsi Pat McFadden bildirib ki, minlərlə dövlət vəzifəsi regionlara köçürülməklə həm vergi ödəyicilərinin pullarına qənaət olunacaq, həm də hökumət xalqı daha real şəkildə əks etdirə biləcək.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
