Mişel Doherti Britaniya tarixində ilk kral astronomu olub
Bakı, 30 iyul, AZƏRTAC
Professor Mişel Doherti Böyük Britaniya Kralı astronomu təyin edilib. O, ölkə tarixində bu vəzifəni tutan ilk qadındır.
AZƏRTAC xarici mediaya istinadla xəbər verir ki, 30 ilə yaxın bu vəzifədə çalışmış kral astronomu Lord Martin Ris təqaüdə çıxdıqdan sonra Doherti onun yerini tutub.
Kral astronomu vəzifəsi 1675-ci ildə yaradılıb. Həmin vaxtlarda bu vəzifəni daşıyan şəxs ulduzlardan istifadə edərək dəniz naviqasiyası məsələləri ilə məşğul olurdu. Zaman keçdikcə, bu vəzifə daha da təntənəli oldu. Bu günlərdə kral astronomu kosmos sahəsində yeni kəşflər haqqında Krala məlumat verir.
Mişel Doherti London İmperial Kollecində işləyir və astrofizika üzrə mütəxəssisdir. Onun elmi maraqları Günəş sisteminin nəhəng qaz planetləri - Saturn və Yupiterin tədqiqi sahəsinə aiddir. Doherti onların maqnit sahələrinin qarşılıqlı təsiri, Saturnun peyki Enselad ətrafında su buxarının aşkarlanması və Yupiterə avtomatik planetlərarası stansiyaların buraxılması üzərində işləyib.
Bu yaxınlarda məlum olub ki, alimlər Yerdən 35 işıq ili uzaqlıqda yaşamaq üçün potensial planet aşkar ediblər. Sistemin mərkəzində bir ulduz - qırmızı cırtdan var. Onun ətrafında beş planet fırlanır. Onların ən uzaqda olanı Yerin Günəşdən aldığı qədər enerjini ulduzdan alır.
Bölmənin digər xəbərləri
