Misirdə pandemiya dövründə qadınlara hamilə qalmamaq tövsiyə olunub
Qahirə, 27 iyun, AZƏRTAC
Misirin Səhiyyə Nazirliyi COVID-19 pandemiyası dövründə qadınlara kontraseptiv vasitələrdən istifadə edərək, imkan daxilində hamilə qalmamağı tövsiyə edib.
AZƏRTAC xəbər verir ki, nazirliyin bəyanatında ölkədə yoluxma hallarının artdığı bir şəraitdə hamiləliyin təhlükəli olduğu vurğulanıb. Əlavə edilib ki, yeni növ koronavirus qanın laxtalanması prosesinə mənfi təsir edir və nəticədə ana bətnindəki körpəni qidalandıran plasentanın zədələnmə ehtimalı artır.
Bu arada, Misirdə COVID-19-a yoluxanların sayı artmaqda davam edir. Səhiyyə Nazirliyi iyunun 26-da yeni növ koronavirusa daha 1625 nəfərin yoluxduğunu bildirib. Qeyd olunub ki, yoluxanların ümumi sayı 63 minə yaxındır. Bundan başqa, son sutka ərzində koronavirusdan 87 nəfər vəfat edib və həyatını itirənlərin sayı 2620-yə çatıb. Məlumatda bildirilib ki, iyunun 26-da karantin xəstəxanalarında 399 pasiyent sağalıb.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
