Misirin futbol yığması 2018-ci ilin dünya çempionatında iştirak edəcək
Qahirə, 9 oktyabr, AZƏRTAC
Misirin futbol yığması 2018-ci ilin dünya çempionatına seçim turnirinin üçüncü mərhələsində Konqo komandasına qalib gəlib və Rusiyada təşkil olunacaq çempionata vəsiqə qazanıb.
AZƏRTAC xəbər verir ki, İsgəndəriyyə şəhərində keçirilən E qrupunun oyunu Misir komandasının xeyrinə (2:1) başa çatıb. İngiltərə “Liverpul”unun hücumçu kimi də fəaliyyət göstərən yarımmüdafiəçisi Məhəmməd Saleh 63-cü dəqiqədə hesabı açıb. O, ikinci hissəyə əlavə edilmiş vaxtın 5-ci dəqiqəsində cərimə zərbəsindən qələbə qolunu vurub. Konqo yığmasında isə Arnold Buka Mutu 88-ci dəqiqədə topu rəqib komandanın qapısından keçirib.
Beləliklə, Misir yığması 12 xal toplayıb və Afrikada keçirilən seçim turu başa çatmamış qrupda birinci yerə çıxıb. Komanda çempionatda sonuncu dəfə 1990-cı ildə iştirak edib.
Misir və Konqo futbolçularının oyununu 86 min tamaşaçı izləyib.
Asya Hacızadə
AZƏRTAC-ın xüsusi müxbiri
Qahirə
Bölmənin digər xəbərləri
