Bakı, 5 iyun, AZƏRTAC

Elm və Təhsil Nazirliyinin Molekulyar Biologiya və Biotexnologiyalar İnstitutunun (MBBİ) və Türkiyənin Dokuz Eylül Universitetinin Biokimya bölməsinin alimləri arasında onlayn formatda görüş keçirilib və elmi müzakirələr aparılıb.

MBBİ-dən AZƏRTAC-a bildirilib ki, toplantının əsas mövzuları Xəzər və Egey dənizlərinin yosun bioresursları əsasında nanobiotexnoloji yollarla hidrogen enerjisi alınması məsələləri olub və bu istiqamətdə birgə əməkdaşlığa dair ilkin razılığa gəlinib. Xüsusi olaraq, birgə layihələrin hazırlanması, gənclərin elmi potensialından istifadə edilməsi, birgə tədqiqat işlərinin və təcrübə mübadiləsinin aparılması üçün səfərlərin təşkili müzakirə olunub.

Toplantıda elmi əlaqələrin gücləndirilməsi və birgə tədqiqat istiqamətlərinin daha da genişləndirilməsi üçün çalışmaların davam etdirilməsi qərara alınıb.