Moskva vilayətində patent əsasında işləyən xarici işçilərin cəlb olunmasına məhdudiyyət qoyulub
Moskva, 2 oktyabr, AZƏRTAC
Moskva vilayətində patent əsasında çalışan xarici vətəndaşların iqtisadiyyatın bir sıra sahələrində əmək fəaliyyətinə cəlb olunmasına qadağa tətbiq edilib.
AZƏRTAC xəbər verir ki, məhdudiyyətlər ixtisaslaşmış mağazalarda spirtli içkilərin və tütün məmulatlarının pərakəndə satışı, nəqliyyat vasitələrindən, səyyar köşklərdə və çadırlarda hazır yeməklərin hazırlanması və satışı, həmçinin bazarlarda dondurma və digər məhsulların satışı sahələrinə şamil edilir. Qadağa, həmçinin təhsil, səhiyyə, sosial yardım, mədəniyyət, idman, asudə vaxtın təşkili və əyləncə fəaliyyətlərinə də aid edilir.
Qaydalara riayət olunmaması inzibati məsuliyyət doğurur, belə ki, vətəndaşlar üçün 2 mindən 4 min rubladək, vəzifəli şəxslər üçün 45 mindən 50 min rubladək cərimə, hüquqi şəxslər üçün isə 800 min rubldan 1 milyon rubladək cərimə və ya 14 gündən 90 günədək fəaliyyətin dayandırılması nəzərdə tutulur.
Qadağa Rusiyada müvəqqəti yaşayış hüququ və ya daimi yaşayış icazəsi olan xarici vətəndaşlara, Avrasiya İqtisadi Birliyinə üzv ölkələrin (Belarus, Qazaxıstan, Qırğızıstan) vətəndaşlarına, həmvətənlərin köçürülməsi proqramının iştirakçılarına, eləcə də yüksəkixtisaslı mütəxəssislərə və onların ailə üzvlərinə şamil olunmur.
AZƏRTAC-ın xüsusi müxbiri
Moskva
Bölmənin digər xəbərləri
