MOSKVADA ÜAK-IN RƏYASƏT HEYƏTİNİN İCLASI KEÇİRİLMİŞDİR
AZƏRTAC-ın xüsusi müxbiri xəbər verir ki, Moskvada Ümumrusiya Azərbaycan Konqresinin (ÜAK) prezidenti, Rusiya Tibb Elmləri Akademiyasının akademiki, RF İctimai Palatasının üzvü Məmməd Əliyevin sədrliyi ilə konqresin növbəti iclası keçirilmişdir. İclasda Heydər Əliyev Fondunun Rusiya nümayəndəliyinin rəhbəri Leyla Əliyeva və Rusiya Prezidenti Administrasiyasının humanitar siyasət və ictimai əlaqələr departamentinin müşaviri Oleq Rojnov iştirak etmişlər.
Tədbirdə ÜAK-ın bu il martın 2-də keçiriləcək Rusiya Federasiyası prezidentinin seçkilərinə hazırlıqla bağlı tədbirlərdə iştirakı və mövqeyi, eləcə də Azərbaycanda prezident seçkilərinə hazırlıq kampaniyasında iştirakı məsələləri müzakirə olunmuşdur. İclasda “Azerbaydjanski konqres” həftəlik qəzetinin Rusiyada və Azərbaycanda yayımlanması, 2008-ci ildə Rusiyanın ali məktəblərinə qəbula hazırlıq, ÜAK Moskva regional şöbəsinin əmək miqrantlarının adaptasiyası və məşğulluğu məsələləri ilə bağlı Moskva hökuməti ilə əməkdaşlığı, eləcə də cari il üçün iş planı nəzərdən keçirilmişdir.
Məruzə ilə çıxış edən ÜAK-ın prezidenti Məmməd Əliyev bildirmişdir ki, Azərbaycan diasporu Rusiyada prezident seçkiləri ilə bağlı mövqeyini müəyyən etmişdir və soydaşlarımızın seçkilərdə fəal iştirakını zəruri sayır. O, ümidvar olduğunu bildirmişdir ki, soydaşlarımız Prezident Vladimir Putinin təklifi ilə irəli sürülən Dmitri Medvedevin namizədliyini dəstəkləyəcəklər. Onun sözlərinə görə, V.Putinin prezidentliyi dövründə Azərbaycan Konqresinə münasibət dəyişmiş, ümumilikdə millətlərarası münasibətlər sahəsində vəziyyət xeyli yaxşılaşmışdır. Rusiyanın çoxsaylı diaspor təşkilatları arasında məhz onun İctimai Palatanın üzvü seçilməsi göstərir ki, Azərbaycan diasporuna yetərincə ciddi münasibət bəslənilir. ÜAK-ın başçısı vurğulamışdır ki, Azərbaycan Prezidenti İlham Əliyev konqresə xüsusi diqqət yetirir, Azərbaycan və Rusiya prezidentlərinin ÜAK-ın II qurultayında iştirak etmələri Rusiyadakı soydaşlarımıza ciddi münasibətdən və diasporumuzun nüfuzundan xəbər verir.
ÜAK-ın rəyasət heyətinin iclasında diasporumuzun Azərbaycan Respublikasının Prezidenti İlham Əliyevin simasında ölkə rəhbərliyinin Ermənistan-Azərbaycan, Dağlıq Qarabağ münaqişəsinin həlli istiqamətində siyasətini dəstəkləyən müraciət qəbul etməsi qərara alınmışdır.
Çıxışlarda gənclərimizin Rusiya ali məktəblərinə qəbul imtahanlarında iştirakının təşkilinə xüsusi yer ayrılmışdır. ÜAK-ın vitse-prezidenti, Təhsil Komitəsinin sədri Tofiq Məlikli bildirmişdir ki, Rusiya Təhsil Nazirliyi ÜAK-ın xahişinə cavab olaraq bu il Azərbaycan diasporu üçün 40 yer ayıracaqdır. Onun sözlərinə görə, bu, çox böyük nailiyyətdir, çünki Rusiyanın nüfuzlu ali məktəblərində təhsil alan azərbaycanlıların sayı artacaqdır. T.Məliklinin fikrincə, ÜAK-da keçirilən qəbul imtahanları barədə soydaşlarımız daha geniş məlumatlandırılmalıdır. Heydər Əliyev Fondunun Rusiya nümayəndəliyinin başçısı Leyla Əliyeva bildirmişdir ki, bu günlərdə Rusiya Azərbaycan Gənclər Təşkilatının (RAGT) saytı açılacaqdır. ÜAK burada öz elanını və qəbul imtahanları ilə bağlı müvafiq izahatlarını yerləşdirə bilər. L.Əliyeva vurğulamışdır ki, gəncləri ehtiyac olan peşələri - jurnalistika, hüquqşünaslıq və digər sahələrə aid ixtisasları seçməyə yönəltmək lazımdır.
T.Məlikli fərqlənən Azərbaycan məktəbli və tələbələrini həvəsləndirmək üçün ÜAK-ın təqaüdünün təsis olunmasını təklif etmişdir. L.Əliyeva vurğulamışdır ki, tələbələr arasında rəqabəti gücləndirən təqaüdlər təsis etmək lazımdır ki, tələbələrin təhsilə marağı artsın. Rusiya nümayəndəliyinin başçısı Moskvada və ölkənin digər regionlarında Bazar günü məktəblərinin açılmasının, habelə regionlarda gənclərin fəallaşmasının vacibliyini bir daha diqqətə çatdırmışdır.
ÜAK-ın Moskva regional şöbəsinin başçısı İlqar Hacıyev Rusiyada miqrasiya ilə bağlı yeni qanunların tətbiqindən sonra miqrantların hüquqlarının müdafiəsinə dair görülən işlərdən danışaraq Moskva hökuməti ilə sıx qarşılıqlı əlaqələrin yaradıldığını, etimadın və qarşılıqlı anlaşmanın yüksək səviyyədə olduğunu vurğulamışdır. Rusiya paytaxtının hakimiyyət orqanları ÜAK Moskva regional şöbəsinin təşəbbüsünə müsbət cavab vermiş və “Bakı” kinoteatrında Novruz bayramının ümumşəhər miqyasında qeyd olunması qərara alınmışdır.
Çap olunduğu beş il ərzində Rusiya KİV-ləri arasında öz yerini tutmuş ÜAK-ın mətbu orqanı olan “Azerbaydjanski konqres” qəzetinin tirajının artırılması və yayım coğrafiyasının genişləndirilməsi məsələləri nəzərdən keçirilmişdir.
ÜAK-ın SSRİ və Azərbaycan Respublikasının xalq artisti Müslüm Maqomayev adına qızıl medalının təsis olunması haqqında əsasnamə təsdiq edilmişdir.
Bölmənin digər xəbərləri
