Münxen Konfransı - Azərbaycanın haqlı mövqeyinin beynəlxalq ictimaiyyətə təqdimat platforması
Bakı, 17 fevral, AZƏRTAC
Azərbaycan vətəndaşları olaraq Münxen Təhlükəsizlik Konfransı (MTK) barədə danışarkən, daha çox bu qurumun 2020-ci ilin fevral ayında keçirilmiş toplantısı üzərində dayanırıq. Həmin toplantı çərçivəsində Prezident İlham Əliyevlə Ermənistanın baş naziri Nikol Paşinyan arasında canlı debat keçirilərək Ermənistan-Azərbaycan münaqişəsinin mövcud durumu müzakirəyə çıxarılmışdı. Bu, bir tərəfdən iki rəqib ölkənin dövlət başçıları arasında keçirilən ilk canlı debat kimi diqqət çəkirdisə, digər tərəfdən keçmiş Qarabağ münaqişəsinin mahiyyətinin açılması baxımından əhəmiyyətli idi. Dövlətimizin başçısı özünün bacarıqlarına əsaslanaraq həmin debatı Ermənistan-Azərbaycan müharibəsinin gerçək mahiyyətinin açılması üçün fürsətə çevirdi. Dünya ictimaiyyəti tərəfindən həssaslıqla izlənilən debat müstəvisində keçmiş Qarabağ münaqişəsinin yaranma səbəbləri, Ermənistanın mövzu üzərində apardığı informasiya manipulyasiyaları və tarixin saxtalaşdırılması amilləri təsvir edildi. Azərbaycan Prezidenti özünün güclü arqumentləri ilə Ermənistanın baş nazirini gülünc duruma saldı. Bundan bir neçə ay öncə - 2019-cu il oktyabrın 3-də Azərbaycan Prezidenti Rusiya Federasiyasının Soçi şəhərində baş tutmuş "Valday” Beynəlxalq Diskussiya Klubunun XVI sessiyası zamanı öz nitqi ilə Ermənistanın baş nazirinə güclü zərbə vurmuşdu. MTK-nın 2020-ci il fevral konfransı zamanı isə dünya ictimaiyyətinin gözü qarşısında Ermənistanın hökumət başçısını nokaut vəziyyətinə saldı. Bununla da “erməni şəbəkəsi”nin uzun illər ərzində apardığı yalançı təbliğatı iflasa uğradı.
Bu fikirləri AZƏRTAC-a açıqlamasında Mətbuat Şurası İdarə Heyətinin üzvü, media eksperti Müşfiq Ələsgərli söyləyib.
Onun fikirlərinə görə, paralel olaraq, Prezident İlham Əliyev MTK-nın fevral konfransı müstəvisində səsləndirdiyi fikirlərlə Azərbaycanın regional və gepolitik əhəmiyyəti, icra etdiyi qlobal layihələr, həmçinin ölkəmizin güclü, qüdrətli cəhətləri barədə təsəvvür formalaşdırdı. Təsadüfi deyil ki, MTK-nın fevral sessiyasının keçirildiyi eyni il çərçivəsində - 2020-ci ilin sentyabr ayında İkinci Qarabağ müharibəsi başlayarkən əksər dünya dövlətləri Azərbaycanın haqlı mövqeyini müdafiə etdilər.
“Münxen Konfransının toplantılarına qatılmaq, orada aktiv iştirak etmək Azərbaycan üçün keçmiş zamanda deyil, indiki anda da zəruridir. Azərbaycanla Ermənistan arasında sülhyaratma prosesi, bu mövzu ətrafında “erməni şəbəkəsi”nin manipulyasiyaları və manevrləri zərurət yaradır ki, ölkəmiz beynəlxalq diqqətdə olan platformalara çıxsın, özünün haqlı mövqeyini ifadə etsin. Eyni zamanda, dünyada və regionda sülhyaratma prosesinə töhfələr versin. Təsadüfi deyil ki, Azərbaycan Prezidenti qısa zaman kəsiyində - 2023-cü ilin 2 ayı ərzində 3 mühüm beynəlxalq platformada iştirak və çıxışlar edib. Belə ki, Azərbaycan Prezidenti yanvarın 15-də Əbu-Dabidə keçirilən Beynəlxalq Dayanıqlıq Həftəsi platformasının rəsmi açılış mərasiminə qatılıb. Yanvarın 19-da isə Davos İqtisadi Forumunda iştirak edib. Forum çərçivəsində keçirilən “Avrasiya Orta Dəhlizi: Yoldan magistrala” mövzusunda panel iclasında məruzə edib. İndi də Münxen Təhlükəsizlik Konfransının 59-cu sessiyasına qatılıb”, - deyə media eksperti vurğulayıb.
O qeyd edib ki, 2023-cü il sessiyası iştirakçı sayına görə MTK-nın ən irimiqyaslı tədbiridir. Konfransa 800 nəfərdən çox iştirakçı dəvət olunub. Avropa İttifaqı Şurasının Prezidenti, Avropa Komissiyasının Prezidenti, BMT-nin ixtisaslaşmış qurumlarının rəhbərləri, NATO, ATƏT, Ərəb Dövlətləri Liqası, Körfəz Əməkdaşlıq Təşkilatı və digər dövlətlərarası təşkilatların baş katibləri də sessiyada iştirak edirlər. Dəvətə layiq bilinmiş dövlət və hökumət başçılarının sayı isə 40 nəfərə yaxındır ki, onlardan biri də Prezident İlham Əliyevdir. Bu, beynəlxalq platformaların təşkilatçıları tərəfindən Azərbaycanın dövlət başçısına yönəlik etimad jestidir. Bəllidir ki, dövlətimizin başçısı ümumilikdə Cənubi Qafqaz regionunun təhlükəsizliyinin təmin olunmasında aparıcı fiqurdur. Həmçinin Avropanın enerji təhlükəsizliyinin təmin olunması, enerji marşrutlarının şaxələndirilməsi, yaşıl enerji, regional kommunikasiya xətlərinin açılması, Orta Dəhliz kimi layihələrdə istiqamətləndirici şəxslərdən biridir. Bütün bu mövzular MTK-nın əhatə və maraq dairəsindədir. Azərbaycan Prezidenti bu istiqamətlər üzrə layihələrin müzakirəyə çıxarıldığı platformalara qatılmaqla ümumi işə ciddi töhfələr verir. Eyni zamanda, bu platformaları Azərbaycanın haqlı mövqeyinin beynəlxalq ictimai rəyə çatdırılması üçün vasitəyə çevirə bilir.
Bölmənin digər xəbərləri
