Münxen Konfransında Cənubi Qafqazın sülh və əməkdaşlıq regionuna çevrilməsi üçün vədlər verildi
Bakı, 21 fevral, AZƏRTAC
Münxen Təhlükəsizlik Konfransında Cənubi Qafqazdakı vəziyyətə həsr olunmuş "Dağları aşmaq? Cənubi Qafqazda təhlükəsizliyin qurulması" mövzusunda plenar iclasda Cənubi Qafqazın üç ölkəsinin lideri iştirak etdi. Prezident İlham Əliyev bu faktı tarixi hadisə kimi dəyərləndirdi. Çünki bu, üç liderin ilk görüşüdür. Bu görüş Cənubi Qafqazın sülh və əməkdaşlıq regionuna çevrilməsinin müzakirəsi baxımından yaxşı fürsət oldu və mühüm vədlər verildi.
Bu fikirləri AZƏRTAC-a açıqlamasında Milli Məclisin deputatı Fatma Yıldırım deyib.
Deputat bildirib ki, panel iclasında dövlətimizin başçısı regionda vəziyyət, Azərbaycanla Ermənistanın münasibətlərinin normallaşması prosesi ilə əlaqədar fikirlərini ifadə etdi. Eləcə də Laçın yolunda ekofəalların keçirdiyi dinc etiraz aksiyası, Qarabağ ərazisində yataqlarımızın qanunsuz istismarına son qoyulması ilə bağlı prinsipial mövqeyini toplantı iştirakçılarının nəzərinə çatdırdı.
“Tədbirdə xatırladıldı ki, Azərbaycan Ermənistana sülh sazişi imzalamağı təklif edib. Beş bənddən ibarət olan təkliflər beynəlxalq hüquq normalarına əsaslanır. Təbii Ermənistanın gələcəyi regionda sülh şəraitində yaşamasından asılıdır. Qonşu ölkələrə ərazi iddialarını davam etdirməsi Ermənistana uğurlu gələcək vəd etmir. Qarabağ ərazisində yaşayan ermənilərə gəlincə, onlar Azərbaycan vətəndaşlarıdır. Dövlətimiz Qarabağdakı erməni azlığın hüquqları və təhlükəsizliyi ilə bağlı tam təminat verdiyini bəyan edib. Amma dövlətimizin başçısının dediyi kimi, bu istiqamətdə müzakirələr erməni icmasının Qarabağda doğulmuş və bütün ömrü böyü orada yaşamış nümayəndələri ilə aparıla bilər. Qarabağda Rusiyadan “rəhbər mövqe” tutmaq üçün göndərilmiş Ruben Vardanyanla belə müzakirələrin aparılması qəbulolunmazdır. Digər tərəfdən, blokadanın olmadığını göstərən ikinci fakt ondan ibarətdir ki, dekabrın 12-dən vətəndaş cəmiyyəti fəallarımızın Laçın yolunda dinc etiraz aksiyasına başlamasından indiyədək 2500-dən çox nəqliyyat vasitəsi, o cümlədən Rusiya sülhməramlılarının və Qırmızı Xaçın təmsilçilərinin yük avtomobilləri keçib. Qarabağdan demək olar ki, 100 pasiyent müalicə üçün Qırmızı Xaç tərəfindən Ermənistana aparılıb. Bütün bunlar blokadanın olmadığını təsdiqləyir”, - deyə Fatma Yıldırım qeyd edib.
Deputatın sözlərinə görə, digər bir vacib məqam isə Laçın yolunda nəzarət-buraxılış məntəqəsinin yaradılmasıdır. Prezident İlham Əliyev ABŞ-nin Dövlət katibi və Ermənistanın baş naziri ilə keçirdiyi üçtərəfli görüşdən sonra jurnalistlərə müsahibəsində bu barədə fikirlərini bildirib. Əlbəttə ki, Laçın istiqamətində Ermənistanla dövlət sərhədində nəzarət-buraxılış məntəqəsinin yaradılması Qarabağ istiqamətində ermənilərin qanunsuz hərəkətlərinin qarşısını alacaq. Bütövlükdə, Azərbaycan Prezidenti Münxen Təhlükəsizlik Konfransında milli maraqlarını yüksək səviyyədə qorudu. Bu, diplomatiyamızın növbəti qələbəsidir.
Bölmənin digər xəbərləri
