Münxendə aparılan müzakirələr Cənubi Qafqazda təhlükəsizliyin qarantının Azərbaycan olduğunu təsdiqləyir - Politoloq
Bakı, 18 fevral, AZƏRTAC
Münxen Təhlükəsizlik Konfransı Azərbaycan üçün çox həssas və eyni zamanda, əhəmiyyətli tədbirdir. Bu tədbirdə yüksək səviyyəli dövlət rəsmiləri iştirak edirlər və orada dünyanın gündəmində olan məsələlər müzakirə olunur.
Bunu AZƏRTAC-a açıqlamasında Siyasi və Hüquqi Araşdırmalar Mərkəzinin rəhbəri politoloq Xəyal Bəşirov deyib.
Politoloq bildirib ki, üç il əvvəl Prezident İlham Əliyev məhz Münxen Konfransı çərçivəsində təşkil edilən panel müzakirələrdə Ermənistanın baş naziri Nikol Paşinyanı siyasi və diplomatik kapitulyasiyaya uğratdı. “Həmin debat hər birimizin yaxşı yadındadır. Azərbaycan Prezidenti Ermənistanın yalnız 30 il ərzində deyil, hər zaman yalan və saxtakar siyasət yürütdüyünü sübut etdi, bir sözlə, həqiqətləri dünyaya çatdırdı. Faktlar və dəlillər qarşısında aciz qalan Paşinyan aciz duruma düşdü və dili dolaşaraq həqiqəti söylədi.
Həmin tarixi debatda Prezident İlham Əliyevin iştirakı elə həmin ilin sonunda Azərbaycanın Vətən müharibəsində qalib gəlməklə öz torpaqlarını geri qaytardığı çətin və şərəfli yolun ən şanlı səhifələrindən biri idi. Müzəffər Ali Baş Komandan İlham Əliyevin rəhbərliyi ilə Azərbaycan Ordusu 44 günlük müharibədə düşməni döyüş meydanında da məğlub etdi. Azərbaycanın Ermənistanı həm siyasi, həm də diplomatik müstəvidə kapitulyasiyaya məcbur etməsinin təməli məhz həmin debatda qoyuldu”, - deyə X.Bəşirov vurğulayıb.
Politoloq bildirib ki, görünür Nikol Paşinyan 2020-ci ilin fevralında keçirilən həmin debatın acısını hələ unutmayıb. Ermənistanın baş naziri məhz bu səbəbdən Münxen Təhlükəsizlik Konfransı çərçivəsində keçiriləcək debatdan yayınır. Erməni tərəfi yaxşı başa düşür ki, Azərbaycan Prezidenti ilə növbəti debat onlar üçün daha biabırçı ola bilər. Çünki Prezident İlham Əliyev bir lider olaraq natiqlik qabiliyyəti, qlobal hadisələrə baxışı və yanaşması ilə fərqlənir. Dövlətimizin başçısı çıxışlarında dolğun, geniş və tarixi faktlarla danışır, fikrini siyasi və beynəlxalq hüquqi sənədlərə əsaslanan tutarlı arqumentlərlə əsaslandırır.
“Çox güman ki, Münxen Konfransında Cənubi Qafqazın təhlükəsizliyi ilə bağlı məsələ müzakirə ediləcək. Hazırda reallıq tamam başqadır. Ötən tədbirdən sonra Vətən müharibəsində Zəfər qazanan Azərbaycan regionun lider dövlətinə çevrilib. Rusiya-Ukrayna müharibəsi ilə əlaqədar Yuxarı Dəhliz iflic vəziyyətinə düşüb. İranın yürütdüyü siyasət nəticəsində Aşağı Dəhlizdən istifadə olunmur. Prezident İlham Əliyevin rəhbərliyi ilə Azərbaycan Avropaya və bütün dünyaya təhlükəsiz, sabit Orta Dəhliz layihəsini təklif edir. Avropanı Asiya ilə birləşdirəcək bu dəhlizin əhəmiyyətli həlqələrindən biri olan Cənubi Qafqazın təhlükəsizliyini məhz Azərbaycan təmin edir. Zəngəzur dəhlizinin açılması bu layihənin seqmentlərindən biridir. Düşünürəm ki, bu konfransda Zəngəzur dəhlizindən də söhbət açılacaq. Azərbaycanın milli maraqlarının müdafiəçisi olaraq Prezident İlham Əliyevin builki Münxen Konfransında çıxışı da yaddaqalan olacaq”, - deyə politoloq fikirlərini yekunlaşdırıb.
Bölmənin digər xəbərləri
