Murmanskda Xocalı faciəsinin 21-ci ildönümünə həsr edilmiş tədbirlər keçiriləcəkdir
Bakı, 13 fevral (AZƏRTAC). Ağ evin saytında yerləşdirilmiş, Azərbaycanın Xocalı şəhərində törədilmiş hərbi cinayətlərin qurbanlarını Anım Günü elan edilməsi barədə ABŞ Prezidenti Barak Obamaya ünvanlanan petisiyanın qəbul edilməsi üçün zəruri olan 100.000 imza fevralın 12-də toplanmışdır.
Rusiya Federasiyasının Murmansk vilayətinin qubernatoru yanında Milli Məsələlər üzrə Məşvərət Şurasının üzvü Əlihüseyn Şükürov AZƏRTAC-a bildirmişdir ki, Murmanskda yaşayan həmvətənlərimiz, Ümumrusiya Azərbaycanlılar Konqresinin üzvləri də bu kampaniyanın populyarlaşmasında və onun haqqında informasiyanın yayılmasında fəal iştirak etmişlər.
2013-cü il yanvarın 26-da Ağ Evin saytında yerləşdirilmiş petisiya (https://petitions.whitehouse.gov/petitions/popular/0/2/0) üçün imza toplanmasının son tarixi 2013-cü il fevralın 25-nə təyin edilmişdi. Zəruri sayda imza həmin tarixə 13 gün qalmış toplanmışdır.
Petisiyada deyilir ki, bu il fevralın 26-da əslən Azərbaycandan olan bir qrup amerikalı və ABŞ-da yaşayan azərbaycanlıların bütün dostları 1990-cı illərin ən dəhşətli hadisələrindən biri, XX əsrin ikinci yarısında keçmiş SSRİ hökumətinin törətdiyi ən geniş miqyaslı hərbi cinayət olan Xocalı qırğınının 21-ci ildönümünü qeyd edəcəklər.
İnsanlıq əleyhinə bu cinayət Ermənistanın indiki prezidentinin bilavasitə rəhbərliyi və fəal iştirakı ilə törədilmişdir.
Bir sıra ölkələr, habelə ABŞ-ın Massaçusets, Men, Texas və Nyu-Cersi ştatları Xocalı soyqırımına həsr olunmuş qətnamə və proklamasiyalar qəbul etmişlər.
Qətnamədə deyilir: “Bu faciənin 21-ci ildönümü ərəfəsində əslən Azərbaycandan olan bir qrup amerikalının və bütün ölkədəki və dünyadakı dostlarımızın adından, Xocalı qırğınına və onun qurbanlarına həsr edilmiş Prezident proklamasiyasının qəbul olunmasında bizi dəstəkləməyinizi xahiş edirik”.
Petisiyada deyilir: “1992-ci il fevralın 26-na keçən gecə erməni hərbi birləşmələri keçmiş sovet ordusunun Xankəndi şəhərində yerləşən 366-cı motoatıcı alayının iştirakı ilə uzun aylar boyu blokadada olan Xocalıya hücum etmiş və bir gecədə bu şəhəri yerlə yeksan etmişlər. Bu qanlı aksiya zamanı dinc əhaliyə amansızcasına divan tutulmuş, 613 nəfər öldürülmüş, onların cəsədləri təhqir edilmiş, 1275 nəfər girov götürülmüşdür. Onlardan 150 nəfərin taleyi hələ də məlum deyildir. Öldürülənlər arasında 63 uşaq, 106 qadın, 70 nəfər qoca və ahıl insan vardı, 8 ailə tamamilə məhv edilmişdir”.
Qeyd edək ki, Xocalı faciəsinə həsr edilmiş tədbirlər Ümumrusiya Azərbaycanlılar Konqresinin Murmansk bölməsində də keçiriləcəkdir.
Azərbaycanın ən yeni tarixində ən faciəli hadisələrdən birinə həsr edilmiş silsilə tədbirlər planının hazırlanması başa çatmaq üzrədir.
Həmin tədbirlərin iştirakçıları Qarabağ münaqişəsi və onun ölkəmiz üçün ağır nəticələri barədə həqiqəti əks etdirən foto-sənədlər və çoxsaylı kitablarla, o cümlədən “Qarabağ reallıqları” silsiləsindən olan kitablar, “Azərbaycan”, “Şuşa. Qrafika” fotoalbomları, Yuri Pompeyevin “Qarabağ gündəliyi”, Elmira Axundovanın “Şəxsiyyət və zaman”, Nikolay Zenkoviçin “Tale ziqzaqları. Heydər Əliyev” kitabları, habelə KİV materialları ilə tanış olacaqlar.
ÜAK vilayət bölməsinin rəyasət heyətinin üzvləri, RAGB fəalları qarşıdakı tədbirlər barədə söhbət açaraq ofisin foyesində hazırlanmış fotokompozisiyanı şərh edirlər. Bu fotokompozisiya 1992-ci il fevralın 25-dən 26-na keçən gecə təpədən dırnağadək silahlanmış erməni millətçiləri tərəfindən Xocalının dinc sakinlərinə qarşı törədilmiş qanlı qırğının qurbanlarına həsr edilmişdir.
XIX-XX əsrlərdə erməni şovinist dairələri tərəfindən azərbaycanlılara qarşı mərhələlərlə həyata keçirilmiş etnik təmizləmə siyasətinin tərkib hissəsi olan Xocalı soyqırımı haqqında həqiqət dünya ictimaiyyətinə, xarici ölkələrin parlamentlərinə çatdırılmalıdır. Azərbaycan xalqına və bütövlükdə insanlığa qarşı yönəlmiş bu ağır hərbi cinayətə beynəlxalq miqyasda siyasi-hüquqi qiymət verilməlidir.
Qeyd etmək lazımdır ki, ÜAK-ın Murmansk bölməsinin fəalları dünya ölkələrinin parlamentlərinə müraciətlər, Xocalı soyqırımına həsr edilmiş press-relizlər və məqalələr hazırlamışlar. Ənənəyə görə bu məqalələr Murmansk vilayəti hökumətinin rəsmi saytında və bir sıra regional KİV-lərdə dərc ediləcəkdir.
Bölmənin digər xəbərləri
