Musiqili Teatrda “Qara qar çiçəyi” hekayəsi əsasında tamaşa təqdim edilib
Bakı, 25 fevral, AZƏRTAC
Fevralın 25-də Azərbaycan Dövlət Musiqili Teatrında Gənclər və İdman Nazirliyi tərəfindən “Xocalıya ədalət!” kampaniyası çərçivəsində “Qara qar çiçəyi” hekayəsi əsasında tamaşa təqdim edilib.
AZƏRTAC xəbər verir ki, tamaşanın nümayişindən əvvəl aparıcı, Əməkdar artist Elnur Kərimov səhnə əsəri barədə məlumat verib. Bildirib ki,
Xocalı soyqırımı qurbanlarının xatirəsinin yüksək səviyyədə qeyd edilməsi və faciənin 27-ci ildönümünün keçirilməsi ilə bağlı Prezident İlham Əliyev fevralın 5-də müvafiq Sərəncam imzalayıb. Tamaşa Sərəncamdan irəli gələn müddəaları təmin etmək və eyni zamanda, “Azərbaycan gəncliyi 2017-2021-ci illərdə” Dövlət Proqramına (gənclər arasında vətənpərvərlik, dövlətçilik, milli-mənəvi və ümumbəşəri dəyərlərə hörmət hisslərinin yüksək səviyyədə aşılanması) müvafiq olaraq nümayiş olunur. Tamaşanın müəllifləri Yefim Abramov və Leyla Bəyim Cəfərova, rejissoru Xalq artisti Vaqif Əsədovdur.
Sonra tamaşa təqdim edilib.
Səhnə sərinin süjet xətti belədir. 1992-ci ilin fevralın 25-dən 26-na keçən gecə erməni quldurları şəhəri tərk etməyə çalışan aciz və günahsız əhaliyə hücum edir. Hələ 10 yaşı tamam olmayan Natəvan Hacıyevanın gözləri qarşısında bir gənc qız təcavüzə məruz qalaraq öldürülür. Natəvanın valideynləri güllələnir, özünün isə gözləri dəstənin komandiri tərəfindən siqaret ilə yandırılır. Qız kor olur və huşunu itirərək komaya düşür. Onu qardaşı Fikrət və qonşuları Pərviz xilas edirlər. Natəvan xəstəxanada 17 gündən sonra özünə gəlir. Oğlanları uşaq evinə aparırlar. Natəvanı isə zəif görən və görmə qabiliyyətini tam itirən uşaqlar üçün internata göndərirlər. Bu hadisədən 25 il ötür. Natəvanın qardaşı Fikrət artıq məşhur jurnalistdir. Onun həyatının yeganə məqsədi o dəhşətli gecənin həqiqətlərini dünya ictimaiyyətinə çatdırmaq və haqq-ədaləti bərpa edəcək müstəqil komissiyaların yaradılmasına, canilərin cəzalandırılmasına nail olmaqdır. Onun da, Azərbaycanın müstəqil təşkilatlarının da səsi səhrada bir səda kimi səslənir. Beynəlxalq təşkilatlar bu səsə və tələblərə biganə və laqeyddirlər. Lakin Fikrət təslim olmur. Onun cəlladları həbs etmək uğrunda yazdığı məqalələri Avropa məmurlarını qıcıqlandırır, hiddətlərinə səbəb olur.
Pərviz tibb institutunda təhsilini tamamlayıb Natəvanla əlaqəni itirir. Natəvan isə artıq məşhur şairədir. Onun iztirablı şeirləri müxtəlif Avropa dillərinə tərcümə edilir, sevilərək oxunur. Lakin o, hələ də faciənin ağrı-acısını yaşayır. Natəvan uzun illərdir ki, gecələr kabuslar görür. O, demək olar ki, gecələr yatmır. Həkimlər isə ona kömək etməkdə acizdirlər. Onun problemi haqqında Hollandiyada yaşayan məşhur psixoterapevt Patrik de Varda eşidir. O, Natəvanı Amsterdama psixoterapiya kursu keçməsi üçün dəvət edir. Həkim əmindir ki, Natəvanı bu xəstəlikdən sağalda biləcək. Seanslardan biri zamanı Patrik de Vardanın yanına İnterpolun nümayəndələri Anna Mari Verner və Neyl Şeldon gəlir. Onlar Natəvana qardaşı Fikrət Hacıyevi tapmaları üçün kömək etməsini xahiş edirlər. İnterpola belə bir məlumat çatıb ki, Fikrəti hədələyirlər. Onlar jurnalisti bu hədələrdən qorumaq istəyirlər. Natəvan onlara bildirir ki, qardaşı ona nadir hallarda zəng edir və onun harada olduğunu bilmir. Natəvan dəhşətli gecə haqqında böyük həyəcanla danışır. Qızın halı xarab olur və huşunu itirir. Həkim İnterpol nümayəndələrindən oradan getmələrini xahiş edir. Cənab Şeldon həkimin bu xəstəyə qarşı olan qayğıkeş münasibətinin əsl səbəbini bildiyini deyir... Həkim Natəvanın qardaşı Fikrətin uşaqlıq dostudur. Onun əsl adı isə Pərviz İsmaykovdu. Həkim Patrik de Vard heç vaxt özünün kimliyini gizlətmədiyini bildirir və deyir ki, o, Avropada təkcə həkimlik təcrübəsini artırmaq üçün deyil, həm də dostuna ədalətə nail olmaq üçün kömək etmək məqsədilə yaşayır. O, qanlı gecəni törədənlər, günahsız insanların qatilləri məhkəməyə cəlb olunub cəzalandırılmalıdırlar. Bir neçə gün sonra İnterpolun təmsilçisi Anna Mari Veber Natəvana və həkimə bir xəbər gətirir...
Bölmənin digər xəbərləri
