Musiqili Teatrın aktrisası beynəlxalq festivaldan diplomla qayıdıb
Bakı, 7 iyul, AZƏRTAC
Azərbaycan Dövlət Akademik Musiqili Teatrının aktrisası, Əməkdar artist Nərgiz Kərimova Ukraynada keçirilən VIII “O-FEST” Beynəlxalq Opera, Operetta və Müzikl festivalında uğurla çıxış edib və diploma layiq görülüb.
Teatrın mətbuat xidmətindən AZƏRTAC-a bildirilib ki, lirik soprano səsli vokalçı beynəlxalq əhəmiyyətli bu tədbirə Ukrayna Milli Operetta Teatrının bədii rəhbəri, festivalın təşkilatçısı Boqdan Strutinskinin dəvəti ilə qatılıb və həmişə olduğu kimi, bu dəfə də ölkəmizi layiqincə təmsil edib.
N.Kərimova Ukrayna ilə yanaşı, Çin, Avstriya, Belarus, Gürcüstan, İran, Qazaxıstan, Litva, Moldova və Sloveniyanın vokalçılarının iştirak etdiyi bu festivalda tamaşaçılar tərəfindən böyük coşqu ilə qarşılanıb. O, festival çərçivəsində keçirilən qala-konsertlərdə İmre Kalmanın “Mister X” operettasından Teodoranın ariyasını və Con Te Partiro (Francesco Sartori) əsərini ifa edib.
Səfərdən yenicə qayıdan aktrisa festival haqqında təəssüratlarını bölüşərək ona bu şəraiti yaradan hər kəsə - çalışdığı teatrın rəhbərliyi başda olmaqla, Azərbaycanın Ukraynadakı səfirliyinin əməkdaşlarına, şəxsən Elmira Axundovaya və beynəlxalq festivalın təşkilatçılarına minnətdarlığını bildirib.
“Dünyanı cənginə alan pandemiya səbəbindən böyük səhnələrdən uzaq düşməyim, sevimli peşəmlə məşğul ola bilməməyim digər həmkarlarım kimi, məni də çox məyus edirdi. Səhnə üçün çox darıxmışdım. Yenidən o mühitə qayıtmaq sanki mənə dünyaları bəxş etdi. Əslində, uzun müddət teatrsız, səhnəsiz qalan bir aktrisa üçün birdən-birə geniş auditoriyalarda tamaşaçıların qarşısına çıxmağın özü də böyük risk və məsuliyyət idi. Lakin hər şey gözlədiyimdən də yaxşı alındı. Hətta festivala gedərkən yollardakı bütün maneələr, təyyarədən-təyyarəyə keçidlər, yuxusuz gecələr, həmin ərəfələrdə orada etdiyim gərgin məşqlərin yorğunluğu - hamısı tamaşaçıların alqış sədaları altında bir göz qırpımında yoxa çıxdı. Arzum budur ki, tezliklə ölkəmizdə də belə möhtəşəm beynəlxalq teatr və musiqi festivalları keçirilsin və biz də yenə öz işimizin, sənətimizin əvvəlki axarına qayıdaq”, - deyə N.Kərimova söyləyib.
Bölmənin digər xəbərləri
