Mütəxəssis: Parkinson xəstələrinə fiziki aktivlik və sağlam qidalanma məsləhət edilir
Bakı, 10 aprel, AZƏRTAC
Parkinson xəstəliyi terminini parkinsonizm sindromundan ayırd etmək lazımdır. Belə ki, adı birinci çəkilən Parkinson sərbəst yaranan nevroloji xəstəlikdir, parkinsonizm sindromu isə Parkinson xəstəliyi ilə eyni əlamətlərə malik sindromdur.
Hərəkətlərin və yerişin yavaşıması, ləngiməsi, bədən ətraflarında və başda əsmələr, titrəmələr, hərəkət məhdudluğu, hərəki donmalar, eyni zamanda, depressiya, həyəcan, əzələ ağrıları, qamətin önə əyilməsi, üzün amimiyası (mimikanın dəyişməz qalması, gülümsəmə qabiliyyətinin itməsi), qoxubilmə qabiliyyətinin azalması, yuxu problemləri Parkinson xəstəliyinin simptomlarıdır.
Bunu AZƏRTAC-ın suallarını cavablandıran Səhiyyə Nazirliyinin mütəxəssis-eksperti, nevroloq Mərziyə Məmmədova deyib.
Nevroloq Parkinsonun müalicə olunmayan xroniki xəstəliklərə aid edildiyini vurğulayıb: “Parkinson xəstəliyi 55 yaş üstü insanlarda daha çox rast gəlinir. Dünya statistikasına görə bu xəstəlik 100 min nəfərdən 21-də müşahidə edilir. Bu, yayılmasına görə Altsheymer xəstəliyindən sonra ikinci neyrodegenerativ problemdir. Müasir dərmanlarla xəstəliyin simptomlarını idarə etmək mümkündür”.
Parkinson xəstəliyində ilkin müdaxilənin vacib olduğunu qeyd edən mütəxəssisin sözlərinə görə, Parkinson proqressivləşən, yəni getdikcə ağırlaşan xəstəlikdir, lakin müalicənin erkən başlaması pasiyentlərin həyat keyfiyyətini uzun müddət yüksək qalmasına kömək edir. Müalicə həm dərmanlarla, həm də qeyri farmakoloji aparılır. Dərman müalicəsi mütləq həkim-nevroloq tərəfindən təyin edilməli, mütəmadi olaraq dərman dozaları titrlənməli, xəstəliyin son vəziyyətinə uyğunlaşdırılmalıdır.
Qeyri-dərman müalicə növü barədə məlumat verən həkim deyib: “Dərmansız müalicə metodu beyinin dərin stimulyasiyasıdır. Bu zaman beyindaxilinə, Parkinson xəstəliyinin yarandığı zonaları stimulyasiya etmək üçün cihaz yerləşdirilir. Həmin cihaz xəstəliyin əlamətlərini azaldır və ya aradan qaldırır. Əlbəttə ki, bu müalicə metodu hər pasiyentə uyğun deyil. Müalicəyə həkim konsiliumu qərar verməlidir. Eyni zamanda, xəstələrə mütəmadi olaraq fiziki aktivlik və sağlam qidalanma məsləhət edilir”.
Bölmənin digər xəbərləri
