MÜVƏKKİL KREDİT TƏŞKİLATLARI İLƏ GÖRÜŞ KEÇİRİLMİŞDİR
Heydər Babayev sahibkarlara dövlət qayğısından danışmış və qeyd etmişdir ki, ümummilli liderimiz Heydər Əliyevin rəhbərliyi ilə başlanmış və hazırda Azərbaycan Prezidenti İlham Əliyev tərəfindən uğurla davam etdirilən iqtisadi islahatlar öz bəhrəsini verməkdədir. Bu gün regionda transmilli layihələrin əsas iştirakçısı olan Azərbaycanda iqtisadi artım sürətlənir, əhalinin rifahı yaxşılaşır. 2006-cı ilin 6 ayı ərzində ümumi daxili məhsulun artım tempi 36,3 faiz təşkil etmiş, əhalinin gəlirləri təxminən 20 faiz çoxalmışdır.
Nazir iqtisadiyyatın belə yüksək sürətlə inkişafında bank sektorunun rolunu xüsusi vurğulamışdır. Məlumat vermişdir ki, bu ilin altı ayında kredit təşkilatları tərəfindən ölkə iqtisadiyyatına 1,6 milyard AZN və ya əvvəlki ilin müvafiq dövrü ilə müqayisədə təqribən 40 faiz çox vəsait ayrılmışdır. Ötən illərdən fərqli olaraq ümumi kredit portfelində uzunmüddətli kreditlərin xüsusi çəkisi artaraq 45 faizi ötmüşdür. Bu isə bankların ölkədəki biznes mühitinə inamını, onların uzunmüddətli investisiya layihələrinə marağının artdığını göstərir. İqtisadi İnkişaf Nazirliyi ilə kredit təşkilatları arasında əməkdaşlığın ən mühüm istiqamətlərindən birinin sahibkarlığın maliyyələşdirilməsi, bu yolla yeni istehsal və xidmət müəssisələrinin açılması, iş yerlərinin yaradılması olduğunu vurğulayan Heydər Babayev qeyd etmişdir ki, bununla əlaqədar, ölkəmizin başçısının tapşırığına əsasən, dövlət büdcəsindən ayrılan vəsaitlərin həcmi ilbəil artırılır. Bu vəsait Sahibkarlığa Kömək Milli Fondu və müvəkkil kredit təşkilatları vasitəsilə güzəştli kreditlər şəklində sahibkarlara verilir. Həmin mexanizm sahibkarlığın inkişafına müsbət təsir etməklə bərabər, bankların da fəaliyyətinin genişlənməsinə, onların regionlarda yeni filiallarının açılmasına səbəb olmuşdur.
Natiq məlumat vermişdir ki, 2006-cı ilin ötən dövrü ərzində Sahibkarlığa Kömək Milli Fondunun vəsaiti hesabına ölkənin 57 şəhər və rayonu üzrə 948 sahibkarlıq subyektinə 43,3 milyon manat güzəştli kredit verilmişdir. Bu layihələr üzrə 9 minə yaxın yeni iş yerinin yaradılması nəzərdə tutulmuşdur. Bu prosesin səmərəsini artırmaq məqsədi ilə Fondun vəsaitlərinin istifadəsi qaydalarının daha da təkmilləşdirilməsinə dair təkliflər təqdim olunmuşdur. Yeni qaydalarda bir layihəyə ayrılan vəsaitin həcminin və müddətinin artırılması, bu prosesin, ümumən, daha da şəffaflaşdırılması nəzərdə tutulur.
Nazir qeyd olunan uğurlarla bərabər, güzəştli kreditlərin verilməsi sahəsində bir sıra problem və çatışmazlıqların olduğunu da diqqətə çatdırmışdır.
Heydər Babayev çıxışının sonunda görüşün məqsədinin həmin problemləri detalları ilə müzakirə etmək, əməkdaşlığın perspektivlərini müəyyənləşdirmək olduğunu vurğulamışdır.
Sonra Sahibkarlığa Kömək Milli Fondunun direktor əvəzi Elçin Zeynalov çıxış edərək, sahibkarlığın güzəştli qaydada kreditləşdirilməsi istiqamətində görülən işlər barədə məlumat verdi.
Görüşdə sahibkarların güzəştli kreditlərdən istifadəsi zamanı əmlakın girov kimi qəbul edilməsi, girov qoyulmuş əmlakı qiymətləndirərkən müstəqil qiymətləndiricilərin xidmətlərindən geniş istifadə olunması, müvəkkil kredit təşkilatlarının filial şəbəkələrinin genişləndirilməsinin zəruriliyi, sahibkarlara göstərilən xidmətin səviyyəsinin yüksəldilməsi, güzəştli kreditlərin təyinatı üzrə istifadə olunmasına nəzarətin gücləndirilməsi və s. məsələlər ətrafında geniş müzakirələr aparılmışdır.
Müvəkkil kredit təşkilatlarının nümayəndələri çıxış edərək, güzəştli kreditlərin verilməsi zamanı qarşılaşdıqları problemlər barədə məlumat vermiş, onların həlli yolları barədə fikirlərini söyləmişlər. Bank nümayəndələri bu problemlərin, əsasən, sahibkarların maarifləndirmə səviyyəsinin aşağı olması, bəzən isə alınmış güzəştli kreditlərin biznes-planda nəzərdə tutulmayan sahələrə yönəldilməsi halları ilə əlaqədar olduğunu qeyd etmişlər.
Tədbiri yekunlaşdıran İqtisadi İnkişaf Naziri cənab Heydər Babayev səslənən təkliflərlə bağlı fikirlərini bildirmiş və onların nəzərə alınacağını vəd etmişdir.
Bölmənin digər xəbərləri
