Muxtar respublikanın ailə təsərrüfatı sahibi olan yeganə qadın-mexanizatoru
Şahbuz, 24 aprel, AZƏRTAC
Son illər Naxçıvan Muxtar Respublikasının Şahbuz rayonunda ailə təsərrüfatı ilə məşğul olanların sayı artır. Bölgədə kənd təsərrüfatının müxtəlif sahələrinin inkişafı üçün həm münbit təbii şərait var, həm də dövlət tərəfindən bu sahəyə lazımi dəstək göstərilir.
AZƏRTAC-ın Naxçıvan bürosu xəbər verir ki, ailə təsərrüfatçısı Sürayyə Quliyeva da bu imkanlardan istifadə edərək öz yaratdığı ailə təsərrüfatını genişləndirir.
Rayonun Ayrınc kənd sakini olan S.Quliyeva son illər muxtar respublikada dövlət tərəfindən ailə təsərrüfatlarının inkişafı üçün yaradılan şəraitdən istifadə edərək öz təsərrüfatını qurub. O, əsasən əkinçiliklə məşğul olur. Əkinini isə Türkeş kəndində aparır. Çünki 2019-cu ildə Türkeş kəndindəki torpaq sahələrində yeni qapalı suvarma sistemlərinin qurulması artıq bu ərazidə yaxşı məhsul əldə etmək üçün əlverişli şərait yaradıb. Buna görə də, S.Quliyeva həmin kəndin ərazisində 188 hektar sahədə taxıl əkini aparıb. Hazırda isə öz ailə üzvləri ilə birlikdə taxıl sahələrini suvarmaqla məşğuldur.
O deyib ki, indi əkdiyi yerlərdə əvvəl suvarma problemləri var idi. Amma ötən il burada yeni qapalı suvarma sistemlərinin qurulması taxıl əkini üçün münbit şərait yaradıb. Ailə təsərrüfatçısı qeyd edib ki, əkin apardığı 188 hektar taxıl sahənin gübrələmə işini artıq yekunlaşdırıb, aqrotexniki qaydada qulluq işləri aparıb.
Təsərrüfatçı tək taxıl əkini ilə deyil, arıçılıq, meyvəçilik və kartofçuluqla da məşğul olur. O bildirib ki, yaxın günlərdə 3 hektar sahədə kartof əkinini həyata keçirəcək. Əkiləcək sahə artıq şumlanıb, toxumluq kartof da tədarük edilib. S.Quliyeva dövlətimizə ailə təsərrüfatçıları üçün yaradılan şəraitə görə minnətdarlığını bildirib.
Qeyd edək ki, S.Quliyeva həm də muxtar respublikada yeganə qadın-mexanizatordur. O, özünə məxsus kənd təsərrüfatı texnikalarını, yük və minik avtomobillərin şəxsən idarə edir. Elə bu bacarığından istifadə edərək ötən il “Naxçıvan Aqrolozinq” Açıq Səhmdar Cəmiyyətindən güzəştli şərtlərlə lizinq yolu ilə yeni kombayn alaraq təsərrüfatında olan texnikaların sayını artırıb. Bu isə təsərrüfatını müxtəlif sahələrdə genişləndirməsinə şərait yaradıb. İndi əkin-biçini də özü vaxtlı-vaxtında aparır.
Bundan başqa, keçən ilin muxtar respublikada “Ailə təsərrüfatları ili” elan olunması S.Quliyevanın hədəflərini daha genişləndirmək üçün yeni imkanlar açıb. O, dövlətimizin ailə təsərrüfatlarına göstərdiyi dəstəkdən daha da ruhlanaraq gələcəkdə iri fermer təsərrüfatı yaratmaq niyyətindədir.
S.Quliyeva 2019-cu ildə muxtar respublikada keçirilən “Ailə təsərrüfatı məhsulları” festivalında “Ən yaxşı məhsul” nominasiyası üzrə birinci yerə layiq görülüb. Təsərrüfat sahibi ölkə başçısının Sərəncamı ilə “Tərəqqi” medalı ilə təltif edilib. O, həm də Ayrınc kəndindəki xidmət mərkəzinin sahibkarıdır.
Bölmənin digər xəbərləri
