Muzdlu silahlı dəstə Nigerdə 14 hərbçini qətlə yetirib
Bakı, 21 iyun, AZƏRTAC
Motosikletlə hərəkət edən 200-dən çox muzdlu silahlı Niger ordusunun Mali ilə sərhəddə yerləşən bazasına hücum edib və azı 34 əsgəri qətlə yetirib. AZƏRTAC “Reuters” agentliyinə istinadla xəbər verir ki, bu barədə ölkənin Müdafiə Nazirliyi məlumat yayıb.
Nazirlik tərəfindən “muzdlu əsgərlər” adlandırılan silahlılar Nigerin qərbindəki Banibanqou şəhərində yerləşən hərbi bazaya basqın ediblər. Hərbçilərlə döyüşdə onlarla terrorçu öldürülüb.
Niger ordusu 2023-cü ildə demokratik yolla seçilmiş Prezident Məhəmməd Bazumun devrilməsində əsas səbəblərdən biri olan silahlı hücumların qarşısını ala bilmədiyi üçün təzyiq altındadır. “İyunun 20-də səkkiz maşın və 200-dən çox motosikleti olan bir neçə yüz muzdlu silahlı tərəfindən Banibanqou şəhərinə qarşı qorxaqcasına və vəhşicəsinə hücum həyata keçirilib”, -deyə nazirliyin dövlət televiziyasında oxunan bəyanatında deyilir. Əlavə edilib ki, ordu hissələri hücum edənlərin izinə düşmək üçün axtarış əməliyyatları aparır.
Niger, Mali və Burkina-Faso arasındakı üçtərəfli sərhədə yaxın olan qəsəbə cihadçı qrupların hücumlarına məruz qalır. Nigerin hakim xuntası onlara qarşı mübarizədə fəal iştirak etmiş Fransa və ABŞ qüvvələrini ölkədən çıxarıb.
Üç ölkə cihadçılarla mübarizə aparmaq üçün ittifaq yaradıb və Qərblə əlaqələri azaldıb. Niger təhlükəsizlik ehtiyacları üçün Rusiya və Türkiyəyə müraciət edib.
Bölmənin digər xəbərləri
