Müzəffər Ali Baş Komandanımız xalqımızın milli qürurunu özünə qaytardı
Bakı, 10 noyabr, AZƏRTAC
Noyabrın 10-u Azərbaycan tarixinə şanlı səhifə kimi yazıldı. Xalqımız bu gün Müzəffər Ali Baş Komandanın rəhbərliyi ilə tarix yazdı, zəfər qazandı. Ulu öndər Heydər Əliyev deyirdi: “Mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümid bəsləyirəm”. Azərbaycan xalqı bu tarixi fikrin gerçəkliyinin bu gün bir daha şahidi oldu.
Bu fikirləri AZƏRTAC-a açıqlamasında Hüquq və İnsan Haqları İnstitutunun böyük elmi işçisi, Aidə Bəndəliyeva deyib.
O bildirib ki, bu bizim son 100 ildə qazandığımız ən böyük qələbəmizdir. Azərbaycan xalqının bir yumruq kimi öz Prezidenti, Müzəffər Ali Baş Komandan İlham Əliyevin ətrafında sıx birləşməsi, həmrəyliyi sayəsində, ordumuzun əzmi, qəhrəmanlığı ilə torpaqlarımız düşmən tapdağından azad olundu: “Bu ədalətli mübarizədə əldə edilən zəfər, xalqımızın uzun illərboyu sağalmayan Qarabağ yaralarına məlhəm oldu. Azad olunan ərazilərimizdə Azərbaycanın üçrəngli bayrağı yenidən dalğalandı. Bu qələbə Azərbaycanın həm hərbi, həm diplomatik, həm də ideya-siyasi arenada olan zəfərinin təntənəsidir. Bu uğurlara xalqımız və dövlətimiz siyasi və hərbi bacarığı, iqtisadi gücü, daxili sabitliyi və özünün dövlət rəhbərinə olan sonsuz inamının gücü ilə imza ata bildi. Əldə etdiyimiz zəfər nəticəsində məcburi köçkün olan vətəndaşlarımız öz doğma yurd-yuvalarına qayıdacaq”.
Aidə Bəndəliyeva diqqətə çatdırıb ki, Azərbaycan bu zəfəri ilə sübut etdi ki, onun uğrunda ölməyi bacaran, azadlığı uğrunda qanını tökməyə hazır olan övladları var. Qarabağın tacı Şuşanın alınması millətimizin qürurunun dirçəlməsi deməkdir. Azərbaycan xalqı bu şücaəti ilə bütün dünyaya yenilməz, bütöv, qəhrəman və azadlıq uğrunda şəhid olmağı özünə ucalıq zirvəsinin fatehi reallığı kimi qəbul edən bir millət olduğunu bir daha göstərdi: “Döyüşlərdə oğlunu, qardaşını, atasını, həyat yoldaşını itirən Azərbaycan qadını Müzəffər Ali Baş Komandana “dayanmayın, arxanızdayıq!” şüarı ilə dəstək verdi. Başına düşmən silahları yağan mülki Azərbaycan vətəndaşı “biz yağı düşməndən qorxub, öz doğma yurdumuzu tərk etməyəcəyik, ölsək də Vətən uğrunda şəhid gedəcəyik. Amma biz qorxmuruq, ordumuza və rəhbərimizə inanaraq, yerimizdən bir addım da çəkilməyəcəyik” deyib, dəyanət göstərdilər. Şəhid valideynləri “Şəhidlər ölməz, Vətən bölünməz!, Vətən sağ olsun!” dedilər”.
Aidə Bəndəliyeva vurğulayıb ki, “Mən hər bir Azərbaycan vətəndaşının Prezidenti olacağam!” deyən Müzəffər Ali Baş Komandanımız xalqımızın milli qürurunu özünə qaytardı.
Bölmənin digər xəbərləri
