Myanma paytaxtının iki rayonunda hərbi vəziyyət rejimi tətbiq edilib
Bakı, 15 mart, AZƏRTAC
Myanmada hakimiyyəti ələ keçirən hərbçilər etiraz aksiyalarının dağıdılması nəticəsində onlarla insanın ölümündən sonra ölkənin paytaxtı Yanqon şəhərinin iki rayonunda hərbi vəziyyət rejimi tətbiq edib.
AZƏRTAC MRTV telekanalına istinadla xəbər verir ki, hərbi vəziyyət hərbçiləri dəstəkləməkdə ittiham olunan Çin kompaniyalarının etirazçılar tərəfindən hücuma məruz qaldığı Hlanqthaye və Şvepyita rayonlarında elan olunub. Bazar günü baş verən insidentlər zamanı etirazçılar taxta dəyənəklər və bıçaqlardan, güc strukturları isə odlu silahdan istifadə edib.
Fəallar iğtişaşlar zamanı 38 nəfərin həlak olduğu, onlarla insanın isə müxtəlif dərəcəli xəsarətlər aldığı barədə məlumat yayıb. Çin kompaniyalarına edilən hücumun təşkilatçısı hələlik məlum deyil.
Qeyd edək ki, fevralın 1-də Myanmada baş verən hərbi çevriliş nəticəsində hakimiyyət silahlı qüvvələrin komandanı Min Aunq Hlaynın əlinə keçib, vitse-prezident Mint Şve isə prezident səlahiyyətlərinin icraçısı təyin olunub. Hərbçilər bir il müddətinə ölkədə fövqəladə vəziyyət rejimi elan edib. Myanma Prezidenti Vin Min, dövlət müşaviri Aun San Su Çji, həmçinin digər yüksək vəzifəli məmurlar saxlanılıb. Onlar 2020-ci il noyabrın 8-də keçirilən seçkiləri saxtalaşdırmaqda ittiham olunurlar.
Bölmənin digər xəbərləri
