Nadir hadisə: “Rafale” qırıcı təyyarəsi elektrik xəttini qıraraq yüzdən çox evi işıqsız qoyub
Paris, 7 mart, AZƏRTAC
Fransada “Dassault Rafale” qırıcı təyyarəsi ilə bağlı nadir insident baş verib. Haute-Loire departamentində təlim uçuşu zamanı qırıcı yüksəkgərginlikli elektrik xəttinə toxunaraq onu qırıb və nəticədə yüzdən çox ev işıqsız qalıb.
AZƏRTAC yerli mətbuata istinadla xəbər verir ki, hadisə Saint-Pierre-Duchamp ərazisində baş verib. Təyyarə Saint-Dizier aviabazasından havaya qalxmışdı.
Elektrik şəbəkəsinin operatoru “Enedis” bildirib ki, insident nəticəsində 104 ev elektrik enerjisindən məhrum olub. Enerjinin generatorlar vasitəsilə bərpa olunacağı qeyd edilib.
“French Air and Space Force” qüvvələri “France Inter” radiosuna açıqlamasında insidentin “Rafale” qırıcılarının çox aşağı hündürlükdə həyata keçirdiyi naviqasiya uçuşu zamanı baş verdiyini bildirib. Məlumata görə, ekipaj elektrik xəttini gec aşkar etdiyi üçün ondan yayınmaq mümkün olmayıb.
Pilot tibbi nəzarətə götürülsə də, təyyarə problemsiz şəkildə bazaya enə bilib. Hadisə ilə bağlı araşdırma aparılır.
Bölmənin digər xəbərləri
