NATO-nun müttəfiqləri böhrana baxmayaraq, ötən il müdafiə xərclərini artırıblar
Madrid, 18 mart, AZƏRTAC
COVID-19 pandemiyası ilə bağlı mövcud iqtisadi sarsıntılara baxmayaraq, NATO-nun demək olar ki, bütün müttəfiqləri 2020-ci ildə müdafiə xərclərini artırıblar.
AZƏRTAC xəbər verir ki, bu fikirləri NATO-nun baş katibi Yens Stoltenberq Şimali Atlantika İttifaqının illik hesabatının təqdimatında deyib. Bildirib ki, NATO-ya üzv olan 30 ölkədən 11-nin xərcləri onların ÜDM-nin həcmini 2 faiz ötüb. Ümumilikdə, 30 tərəfdaşın müdafiəsinə qoyulan investisiyalar 3,9 faiz artıb.
Bununla belə, NATO Avropadakı tərəfdaşlarını hərbi məsələlərdə iqtisadi səyləri artırmağa çağırıb.
Y.Stoltenberq bildirib ki, Fransa, Norveç və Slovakiya 2 faiz hədəf göstəricisinə nail olan ölkələr qrupuna qoşulub. 28 Avropa müttəfiqi və Kanada birlikdə altıncı ildir bir-birinin ardınca hərbi xərcləri artırıb.
Yalnız Bolqarıstan, Albaniya və Sloveniya 2020-ci ildə ondan əvvəlki illə müqayisədə müdafiə sahəsinə daha az sərmayə yatırıblar. NATO-nun hesablamalarına görə, tərəfdaşlarının ötənilki hərbi xərcləri ümumən 1,03 trilyon dollar (860 milyard avro) təşkil edib.
ÜDM-nin böyük hissəsini (3,75 faiz) müdafiə sahəsinə yönəldən Amerika Birləşmiş Ştatları NATO-nun maliyyələşdirilməsində əvvəlki tək lider olaraq qalır.
Nigar Cəfərli
AZƏRTAC-ın xüsusi müxbiri
Madrid
Bölmənin digər xəbərləri
