Naxçıvan Dövlət Universiteti Televiziyası muxtar respublikanın ərazisində yayıma başlayıb
Naxçıvan, 17 mart, AZƏRTAC
Naxçıvan Dövlət Universiteti Televiziyasının Naxçıvan Muxtar Respublikası ərazisində yayımı ilə bağlı təqdimat mərasimi keçirilib.
NDU-nun Televiziya, mətbuat və ictimaiyyətlə əlaqələr bölməsindən AZƏRTAC-ın Naxçıvan bürosuna bildirilib ki, tədbirdə əvvəlcə universitet televiziyasının efirinə baxış olub. Azərbaycan Respublikasının Dövlət Himninin səsləndirilməsi ilə başlanan efirdə “Xəbərlər” buraxılışı verilib. Media Mərkəzinin fəaliyyətini əks etdirən videoçarx nümayiş olunduqdan sonra ali təhsil ocağının rektoru Elbrus İsayev çıxış edərək universitetin qazandığı uğurlardan danışıb, televiziyanın muxtar respublikanın ərazisində yayıma başlamasının əhəmiyyətini qeyd edib.
Elbrus İsayev bildirib ki, muxtar respublikada jurnalist kadrlara olan ehtiyac nəzərə alınmaqla, 2001-ci ildən universitetdə Jurnalistika ixtisası üzrə kadr hazırlığına başlanılıb. Ali Məclis sədrinin xüsusi diqqət və qayğısı, jurnalist ixtisasında dərs deyən müəllimlər, Media Mərkəzinin işçi heyəti və gənc jurnalistlərin səyləri nəticəsində universitet televiziyası fevral ayının 24-dən etibarən muxtar respublika ərazisində yayıma başlayıb. Televiziya həftənin I, III və V günlər saat 11:00-dan 15:00-dək efirdə olur. Rektor gənc jurnalist kadrların peşə hazırlığının yüksəldilməsi və gələcəkdə daha böyük nailiyyətlərə imza atılması üçün kollektivin birgə əməyinin vacibliyini qeyd edib və əlamətdar gün münasibətilə universitetin kollektivini təbrik edib.
Naxçıvan Muxtar Respublikası Dövlət Televiziya və Radio Verilişləri Komitəsinin sədri Sahil Tahirli vurğulayıb ki, bu tarixi hadisə nəticəsində Naxçıvan Dövlət Televiziyası ilə Naxçıvan Dövlət Universiteti Televiziyası arasında əməkdaşlıq üçün münbit zəmin yaranıb. Muxtar respublika televiziyasının kadr potensialının təmin edilməsində universitet televiziyasının gələcək perspektivlərinin mühüm əhəmiyyətə malik olduğunu qeyd edən komitə sədri televiziyanın verilişlərinin zənginləşdirilməsində hər cür dəstəyə hazır olduqlarını ifadə edib.
Universitet televiziyasının yayım parametrləri barədə danışan Naxçıvan Muxtar Respublikası “Radio-Televiziya Ötürücü Mərkəzi” publik hüquqi şəxsin direktoru Hikmət Əhmədov yayım avadanlıqlarının yenilənməsi və televiziyanın maddi-texniki bazasının gücləndirilməsi istiqamətində görüləcək işlərdə iştirak etməyə hazır olduqlarını deyib.
Muxtar respublikanın Televiziya və Radio Şurasının sədri Rauf Əliyev universitet televiziyasının gələcəyə hesablanmış perspektivlərindən danışıb. Qeyd edib ki, muxtar respublikada fəaliyyət göstərən digər media qurumları ilə əməkdaşlığın inkişaf etdirilməsi, qarşılıqlı yaradıcılıq müzakirələrinin aparılması uğurlu nəticələrə yol açacaqdır.
Universitetin Televiziya, mətbuat və ictimaiyyətlə əlaqələr bölməsinin müdiri Səadət Əliyeva televiziyanın yaradıcılıq imkanları, Universitet Televiziyasının əməkdaşı Aqşin Məhərrəmli isə maddi-texniki bazası haqqında danışıblar. Çıxışlarda universitet televiziyasının keçdiyi yola nəzər salınıb, qazanılan uğurlar tədbir iştirakçılarının diqqətinə çatdırılıb. Göstərilən etimada layiq olmaq və gələcəkdə televiziyanın imkanlarının geniş, əhatəli olacağına əminlik ifadə olunub.
Tələbə-jurnalistlərin təcrübələrinin formalaşması üçün baza rolunu oynayan Media Mərkəzinin fəaliyyətindən bəhs edən universitetin Jurnalistika ixtisası üzrə II kurs tələbəsi Məcid Əkbərov yaradılan şəraitə görə tələbələr adından minnətdarlığını ifadə edib.
Sonra Media Mərkəzinin fəaliyyətində aktiv iştirak edən tələbə-jurnalistlərə təşəkkürnamə və kitablar təqdim olunub.
Sonda Media Mərkəzində yaradılan şəraitlə tanışlıq olub, birgə əməkdaşlıq məsələləri müzakirə edilib.
Bölmənin digər xəbərləri
