Acarıstandan gələn qrupun tərkibində 28 nəfər olub. Onlardan 23-ü müalicə üçün gəlmişdi. Digər 5 nəfər isə Acarıstan Muxtar Respublikası Səhiyyə Nazirliyinin əməkdaşları və valideynlər idilər.

Qonaqların muxtar respublikaya səfərlərinin sonuncu günündə Duzdağ Fizioterapiya Mərkəzində acarıstanlı uşaqlarla görüşüb söhbət etdik. Müalicələrinin nəticələri ilə maraqlandıq, onların qədim diyarımız barədə təəssüratlarını öyrəndik.

İlk həmsöhbətimiz 10 yaşlı Aleksandr Bajunaişvilidir. Yaşının az olmasına baxmayaraq, fikirlərini aydın ifadə edən Aleksandr Duzdağ Fizioterapiya Mərkəzində aldığı müalicənin müsbət nəticələrindən və qədim Naxçıvanın onu heyran etməsindən xeyli danışdı. O dedi ki, mən üç il bundan əvvəl təngnəfəsliyə səbəb olan bronxial astma xəstəliyinə tutulmuşam. Həkimlər və valideynlərim deyirlər ki, bizim yaşadığımız Batuminin rütubətli havası mənim xəstəliyimə pis təsir edir. Ancaq Naxçıvana çatan andan tamamilə başqa əhval-ruhiyyədəyəm. Xəstəliyimi demək olar ki, tamamilə unutmuşam. Bu cənnət məkanın quru və təmiz havası çox xoşuma gəlir.

“Duzdağ Fizioterapiya Mərkəzindəki nəhəng tunelə gələndə isə daha da rahatlaşırdım”, - deyən Aleksandr onu da əlavə etdi ki, Acarıstanda xəstəliyimin sağalması üçün çox dərman qəbul edirdim, ancaq xeyri olmurdu. Duzdağda isə elə bil gözəgörünməz bir qüvvə mənə hər gün daha çox şəfa verirdi. İndi özümü tam sağlam hiss edirəm. Ona görə də çox sevinirəm.

Aleksandrın anası Keti Xajaliya söhbətə qoşularaq dedi: “Uşaqlarımızın çarəsiz xəstəliyə düçar olduğunu düşünən biz valideynlər buradakı yüksək səviyyəli müalicəyə görə Naxçıvan Muxtar Respublikası Ali Məclisinin Sədri Vasif Talıbova nə qədər minnətdarlıq etsək, yenə azdır. Bu gözəl diyara gəldiyimiz ilk gündən çox böyük diqqət, nümunəvi Naxçıvan qonaqpərvərliyi ilə əhatə olunmuşuq.

Duzdağ Fizioterapiya Mərkəzində də bizə hər cür diqqət və qayğı göstərirlər. Həkimlər mütəmadi olaraq uşaqların vəziyyəti ilə maraqlanırlar. Müalicənin gedişini xüsusi diqqətdə saxlayırlar. Hər bir istəyimiz dərhal yerinə yetirilir. Baş həkim Ruslan Süleymanovun hər bir uşaqla yaxından ünsiyyət qurması, onları sağalacaqlarına inandırması müalicənin əla nəticələnəcəyindən xəbər verir.

Budur, mənim oğlum artıq sağalıb. Əvvəllər çoxsaylı dərmanlardan istifadə edirdiksə, indi heç bir dərmana ehtiyac duymuruq. Buna görə bizimlə maraqlanan hər kəsə minnətdarlıq edirəm”.

Müalicəsi uğurla başa çatan uşaqların hər birinin çöhrəsində sevinc var idi. Onların arasından 8 yaşlı qızcığaz - Tamta Dzirkvadze bizə yaxınlaşaraq, balacalara xas olan əda ilə kəlməni-kəlməyə calayaraq dostlarının adından minnətdarlıq edərək dedi: “Burada əla müalicə olunmuşuq. Mən də, dostlarım da özümüzü sağlam hiss edirik. Anama söz vermişəm ki, buradan qayıdandan sonra xəstələnməyim. Bundan sonra artıq digər sağlam həmyaşıdlarım kimi hər gün məktəbə gedəcəyəm, dərslərimi yaxşı oxuyacağam. Bir də buradan uzaqda olsam da, mənim sağalmağıma kömək edənlərə hər gün dua edəcəyəm...”

Söhbətə qoşulan 11 yaşlı Tema Şavidze balaca Tamtanın dediklərinə əlavələr etmək istədiyini bildirdi: “Əslində, Tamta da, mən də, digər uşaqlar da onu demək istəyirik ki, biz Naxçıvanda təkcə müalicə olunmadıq, həm də gəzintiyə çıxdıq, çox gözəl tarixi yerlərlə, təbiət mənzərələri ilə tanış olduq. Mən və digər uşaqlar Naxçıvandakı muzeyləri ziyarət edərkən çox şey öyrəndik. Bizə ətraflı məlumat verildi. Mən tarixə maraq göstərdiyim üçün bu məlumatlara sonsuz maraqla qulaq asırdım”.

Temanın anası Keti İmnadze övladının sözünə qüvvət verərək dedi ki, biz hər dəfə hansısa muzeyi ziyarət edəndə, tarixi abidəyə baxanda, Naxçıvanın tarixinə dair məlumatları dinləyəndə heyrətə gəlirdik. Sizin torpağınızın çox qədim və maraqlı tarixi var və bunları öyrənən hər kəs daha çox məlumat almaq ehtiyacı hiss edir”.

Xanım Keti İmnadze onu da bildirdi ki, ziyarət etdiyimiz Möminə Xatın türbəsi, “Naxçıvanqala” Tarix-Memarlıq Muzey Kompleksi, Xan Sarayı, Nuh Peyğəmbərin məqbərəsi, xüsusən Əshabi-Kəhf ziyarətgahı həm uşaqları, həm də bizi heyran etdi. Bizim hamımızın ümumi rəyi belədir ki, Naxçıvan sirli-sehrli, möcüzəli bir yerdir. Mən gördüklərimə əsaslanıb deyə bilərəm ki, Naxçıvan açıq səma altında muzeydir. Onun hər daşının altında min illərin tarixi yatır. Təkcə bizim üçün deyil, bəşəriyyət üçün digər başqa bir möcüzə isə Duzdağdır. Bura istər uşaqlar, istərsə də böyüklər üçün təbii şəfa mənbəyidir. Mən çox sevinirəm ki, övladım məhz burada şəfa tapdı.

Liza İmnadze artıq 3 ildir ki, ardıcıl olaraq Naxçıvana gəlir, Duzdağ Fizioterapiya Mərkəzində müalicə olunur. Onun dediyinə görə, xəstəliyi çox ağırlaşdığı üçün əziyyət çəkirdi. Ancaq Duzdağda müalicə edildikdən sonra sağlamlığına qovuşub. Lizanın tam sağlamlığına qovuşması üçün həkimlər bir neçə müalicə seansının qəbul edilməsini tövsiyə ediblər. Artıq nəticə əldə edilib.

Liza deyir ki, mən elə bilirdim sağalmayacağam. Ancaq Duzdağda müalicədən sonra möcüzənin şahidi oldum, sağlamlığıma qovuşdum. Bizim bu gözəl diyara gəlməyimizə, burada müalicəmizin təşkil olunmasına köməyini əsirgəməyənlərə minnətdarlığımı bildirirəm.

Onun sözlərinə görə, hər il Naxçıvana gələndə burada çox yeniliklərlə qarşılaşır, bu qədim diyarın daha da gözəlləşdiyini görür. Burada yeni binalar inşa edilir, yollar salınır, abadlıq-quruculuq işləri vüsət alır.

Bu məqamda İrema İmnadze söhbətə qoşularaq təkcə qızı Lizanın deyil, buraya gələn valideynlərin və Acarıstan nümayəndələrinin də muxtar respublikada görülən işlərə heyran qaldıqlarını bildirərək dedi: “Bu gün Naxçıvan çox böyük sürətlə inkişaf edir. Mən qızımla bərabər 3 ildir ardıcıl olaraq, buraya gəlirəm. Lizanın dediyi kimi, hər il çox böyük, genişmiqyaslı müsbət dəyişikliklərin şahidi oluram. İnfrastruktur yüksək səviyyədə qurulub. Buna görə də hesab edirəm ki, Naxçıvanda turizmin inkişafı üçün hər cür şərait var.

Bu şəhərdə binalar, otellər müasir tələblər səviyyəsindədir. Buna qonaqpərvərliyi də əlavə etsək, onda Naxçıvana gələn hər bir xarici ölkə vətəndaşının burada özünü doğma vətənindəki kimi rahat hiss etdiyini deyə bilərəm”.

Xanım İrema İmnadze onu da əlavə etdi ki, dünyanın bir sıra ölkələrindən astma xəstələrinin üz tutduqları Duzdağ Fizioterapiya Mərkəzində xəstələr üçün yaradılan şərait və onların müalicəsinə göstərilən diqqət çox yüksək səviyyədədir. Naxçıvan Muxtar Respublikasının rəhbəri burada belə bir möhtəşəm müalicə mərkəzini yaratmaqla, əslində, insanlığa böyük töhfə verib.

Acarıstan Muxtar Respublikası Səhiyyə Nazirliyinin baş mütəxəssisi, qrupun rəhbəri Marika Xalvaşi deyilən fikirlərə tam şərik olduğunu bildirdi. Qeyd etdi ki, hazırda Naxçıvan Muxtar Respublikası ilə Acarıstan Muxtar Respublikası arasında dostluq və əməkdaşlıq sürətlə inkişaf edir. Bu tədbir də əməkdaşlığın bir nümunəsidir.

“Biz bir daha şahidi oluruq ki, astma xəstəliyindən əziyyət çəkən uşaqlar Naxçıvanda müalicə aldıqdan sonra səhhətləri yaxşılaşır, dərman preparatlarından asılı vəziyyətə düşən bəzi uşaqlar artıq bu asılılıqdan xilas olurlar”, - deyən Marika Xalvaşi Acarıstan ilə Naxçıvan arasındakı mehriban əlaqələrin gələcəkdə də bu kimi humanitar aksiyaların davam etdirilməsinə şərait yaradacağına əmin olduğunu bildirdi.

Rauf Əliyev

AZƏRTAC-ın Naxçıvan Muxtar Respublikasındakı

bürosunun rəhbəri