Nazir: Rəqəmsal dövlət idarəçiliyində süni intellektin rolu genişlənir
Bakı, 24 oktyabr, AZƏRTAC
Bu gün süni intellektin dövlət idarəetməsinin bütün sahələrinə inteqrasiyası strateji zərurətə çevrilib. Xüsusilə sosial sahədə son illərdə aparılan islahatlar çərçivəsində rəqəmsal transformasiya istiqamətində mühüm nəticələr əldə olunub. 2018-ci ildən etibarən sosial sahədə dərin islahatlar mərhələsinə qədəm qoymuşuq. Ötən 5 il ərzində ölkə başçısının rəhbərliyi ilə 5 böyük sosial islahat paketi qəbul və icra olunub. Bu islahatlar nəticəsində əmək münasibətləri və məşğulluq sahəsində ciddi irəliləyişlər müşahidə edilir.
AZƏRTAC xəbər verir ki, bu fikirləri DOST Agentliyinin təşkilatçılığı ilə “SOCGOV 2025: Süni intellekt - insan və transformasiya üçün” mövzusunda keçirilən beynəlxalq konfransda “Rəqəmsal dövlət və süni intellektlə transformasiya” panel sessiyasında əmək və əhalinin sosial müdafiəsi naziri Anar Əliyev deyib.
Nazir dövlət idarəçiliyində rəqəmsal texnologiyaların, xüsusilə süni intellektin tətbiqinin əhəmiyyətindən danışıb. O bildirib ki, islahatların əsas istiqamətlərindən biri elektronlaşma, digəri isə “DOST konsepsiyası” olub. “ASAN xidmət” modelindən ilhamlanaraq formalaşdırılan bu konsepsiya vətəndaşlara operativ, şəffaf və rahat sosial xidmətlərin göstərilməsini təmin edir.
Anar Əliyevin sözlərinə görə, hazırda Əmək və Əhalinin Sosial Müdafiəsi Nazirliyi əmək münasibətləri, məşğulluq, əlillik və reabilitasiya kimi bütün əsas fəaliyyət istiqamətlərində tam elektron keçidə nail olub: “Bu gün əmək müqavilələrinin 90 faizi elektron sistem üzərindən qeydiyyatdan keçir. Növbəti mərhələdə bu prosesin tam rəqəmsallaşdırılması, eyni zamanda, süni intellekt texnologiyalarının tətbiqi prioritetimizdir”.
Nazir, həmçinin qeyd edib ki, məşğulluq sahəsində fərdi yanaşma və proqnozlaşdırma sistemlərinin qurulması süni intellektin köməyi ilə mümkün olacaq. Bu, işsiz şəxslərin bacarıqlarına uyğun vakansiyalara yönləndirilməsini və işəgötürənlərlə effektiv əlaqələrin qurulmasını təmin edəcək. Əlavə olaraq, əlillik, reabilitasiya və sosial-psixoloji dəstək sahələrində də süni intellektin tətbiqi genişləndiriləcək.
Anar Əliyev vurğulayıb ki, nazirlik artıq 2019-cu ildən etibarən pensiya və sosial müavinətlərin proaktiv şəkildə ödənilməsi mexanizmini tətbiq edib: “Bu sistemlər süni intellekt elementlərinin ilkin tətbiqi kimi qiymətləndirilə bilər. Növbəti mərhələdə biz bu yanaşmanı bütün sosial ödənişlərə şamil etməyi planlaşdırırıq”.
Nazir bildirib ki, 3 illik strategiya çərçivəsində sosial sahədə elektronlaşma və süni intellekt texnologiyalarının tətbiqi daha da genişləndiriləcək: “Əsas məqsəd vətəndaşlara göstərilən xidmətlərin şəffaflığını və operativliyini artırmaq, qəbul olunan qərarların səmərəliliyini yüksəltmək, sosial idarəetmədə çevikliyi təmin etməkdir. Bütün bu proseslərin əsas hədəfi insan amilinin gücləndirilməsi, sosial rifahın təmin olunması və dövlət idarəetməsində innovativ yanaşmanın formalaşdırılmasıdır”.
Bölmənin digər xəbərləri
