“NEFT DAŞLARI” NQÇİ-NİN KİTABXANASINA ŞAİR VLADİMİR QAFAROVUN ADI VERİLMİŞDİR

20.05.2004 [00:11]
Çap et
A⁺ A^-

Azərneft İstehsalat Birliyinin “Neft daşları” Neft və Qazçıxarma İdarəsinin (NQÇİ) kitabxanasına tanınmış şair və tərcüməçi Vladimir Qafarovun adı verilmişdir. NQÇİ-nin sosial inkişaf və məişət şöbəsi rəisinin müavini Kamal Dadaşov AZƏRTAC-ın müxbirinə bildirmişdir ki, kitabxananın 50 ildən çox yaşı var. Çox xoşdur ki, bundan sonra kitabxanamız Vladimir Qafarov kimi gözəl insan və şairin adını daşıyacaqdır. Şairi idarənin kollektivi ilə səmimi dostluq telləri bağlayırdı. O, tez-tez Neft daşlarında olur, neftçilərlə ünsiyyət saxlamağı xoşlayırdı. Hərdən aylarla burada qalır, şerlər yazırdı.

Kitabxana kütləvidir. Oxucular burada həm texniki, həm də bədii və siyasi ədəbiyyatla tanış ola bilərlər. Kitabxananın fondunda on mindən çox kitab var. Fond təkcə NQÇİ-nin hesabına alınan kitablarla deyil, həm də hədiyyə olaraq verilən kitablar hesabına zənginləşir. Burada 70 nəfərlik oxucu zalı da açılmışdır.

Mayın 19-da Vladimir Qafarovun 69 yaşı tamam olacaqdı. Kitabxanada bu münasibətlə onun mədəndə fəhlələrlə görüşdüyü anları əks etdirən fotoşəkillərindən və şer kitablarından ibarət stend yaradılmışdır. NQÇİ yaxın günlərdə şairin xatirə gecəsini keçirmək niyyətindədir.

Xatırladaq ki, Vladimir Qafarov əməkdar incəsənət xadimi, “Humay” və M.Müşfiq mükafatlarının nominantıdır.