Neft yataqlarının kəşfiyyatı işlərini sürətləndirən kvant alqoritmi hazırlanıb
Bakı, 6 fevral, AZƏRTAC
M.V. Lomonosov adına Moskva Dövlət Universitetinin (MDU) “Fotonik və kvant texnologiyaları. Rəqəmsal tibb” Elmi-Tədris Məktəbinin mütəxəssisləri seysmik məlumatların təhlili üçün kvant alqoritmini işləyib hazırlayıblar. Bu kəşf neft yataqlarının geoloji kəşfiyyatının aparılması üçün tələb olunan vaxtı azaldacaq. AZƏRTAC bu barədə TASS agentliyinə istinadla xəbər verir.
MDU mətbuat xidmətinin məlumatında deyilir: “Alqoritm hesablamalar nöqteyi-nəzərindən mürəkkəb halda seysmik məlumatların inversiyasına əsaslanan ətraf mühitin 3D modelinin qurulması problemini həll etməyə imkan verir ki, bu da klassik kompüterdə onun həlli zamanı xeyli vaxt tələb edir. Yeni alqoritm gələcəkdə həmin vaxtı əhəmiyyətli dərəcədə azaldacaq və neft yataqlarının geoloji kəşfiyyatı ilə bağlı problemlərin həllində daha yüksək dəqiqliyə nail olunacaq”.
Moskva Dövlət Universitetində hazırlanmış alqoritm xüsusi kvant kompüterlərindən istifadə etməklə seysmik məlumatların təhlili üçün nəzərdə tutulub. O, əks olunan seysmik dalğaların ölçülməsinin nəticələrinə əsasən geoloji süxurların strukturunu və tərkibini müəyyən etməyə imkan verir.
Rusiyalı alimlərin kəşfinin təfsilatları “Laser Physics Letters” jurnalında dərc olunub.
Bölmənin digər xəbərləri
