Bakı, 22 fevral (AZƏRTAC). XX əsrin ən dəhşətli faciəsi olan Xocalı soyqırımından 21 il ötür. Bununla əlaqədar olaraq bütün idarə və müəssisələrdə anım tədbirləri keçirilir, erməni vəhşiliyinin ən bariz nümunəsi olan bu faciənin soyqırımı kimi tanıdılması istiqamətində səylərin artırılmasının vacibliyi diqqətə çatdırılır. 

Azərbaycan Respublikası Dövlət Neft Şirkətinin (ARDNŞ) “Neftqazelmitədqiqatlayihə” İnstitutunda da Xocalı faciəsinin 21-ci ildönümü ilə bağlı tədbir keçirilmişdir.

Əvvəlcə Xocalı soyqırımı zamanı qətlə yetirilmiş insanların xatirəsi bir dəqiqəlik sükutla yad edilmişdir.

Sonra çıxış edən institutun direktoru Fəxrəddin İsmayılov bildirmişdir ki, ermənilər havadarlarının dəstəyi ilə zaman-zaman azərbaycanlılara və türklərə qarşı soyqırımı siyasəti həyata keçirmişdir. Xocalı soyqırımı bunun bariz nümunəsidir. 1988-ci ildə ermənilərin əsassız torpaq iddiasının yenidən baş qaldırmasının nəticəsi olaraq Ermənistan-Azərbaycan, Dağlıq Qarabağ münaqişəsi yaranmışdır. Hazırda iyirmi faiz torpaqlarımız işğal altında, bir milyondan çox soydaşımız isə qaçqın və məcburi köçkün vəziyyətindədir. Ermənilərin “dənizdən-dənizə Böyük Ermənistan” yaratmaq ideyalarını gerçəkləşdirmək istəkləri yüzlərlə kəndin, şəhərin dağılması, on minlərlə günahsız insanın ölümü, yüz minlərlə azərbaycanlının öz tarixi torpaqlarından didərgin düşməsi ilə nəticələnmişdir. Tarix faktlara əsaslanır. Ermənilər özlərinə saxta tarix yazmış, dünyanı yalanlarına inandırmaq üçün nə qədər səylər göstərsələr də, hər zaman fakt qarşısında aciz qalıblar.

Azərbaycan Prezidenti İlham Əliyevin “Ermənilər həmişə türklərə, azərbaycanlılara qarşı soyqırımı siyasəti aparmışlar. Keçmiş tarixdə də belə olmuş, yaxın tarixdə də belə olmuşdur və Xocalı soyqırımı bunun bariz nümunəsidir. Günahsız insanları, uşaqları, yaşlı qadınları qətlə yetirmək soyqırımı deyil, bəs nədir? Ancaq əfsuslar olsun ki, dünya birliyi bunu ya görmür, ya da görmək istəmir, ermənilərin, erməni lobbisinin və dünya ermənilərinin uydurma faktları əsasında qərar qəbul edirlər” fikri bir daha diqqətə çatdırılmışdır. Qeyd olunmuşdur ki, Azərbaycan Prezidenti İlham Əliyev hər zaman bu yalan təbliğata qarşı öz siyasətimizi, həqiqətlərimizi, ən əsası gücümüzü ortaya qoymağın vacibliyini bəyan edir.

Bildirilmişdir ki, Azərbaycan iyirmi beş ildir müharibə şəraitində yaşayır. Ötən bu dövr ərzində erməni vəhşiliyini, Ermənistanın işğalçılıq siyasətini təsdiqləyən yüzlərlə faktlar aşkarlanaraq beynəlxalq ictimaiyyətin diqqətinə çatdırılmışdır. Xocalı faciəsinin soyqırımı kimi tanıdılması istiqamətində görülən işlər öz müsbət nəticəsini verməkdədir. Pakistan, Meksika, Kolumbiya parlamentinin, ABŞ-ın bir çox ştatlarının Xocalı faciəsini soyqırımı kimi tanıması uğurlarımız sırasındandır.

Tədbirdə diqqətə çatdırılmışdır ki, Xocalı faciəsi 1992-ci il fevralın 25-dən 26-na keçən gecə erməni silahlı qüvvələri ilə Xankəndi şəhərində yerləşdirilmiş Rusiyanın 366-cı motoatıcı alayının zirehli texnikası və hərbi heyətinin köməyi ilə törədilmişdir. Hücumdan əvvəl fevralın 25-i şəhər toplardan və ağır zirehli texnikalardan atəşə tutulmuş, nəticədə böyük dağıntılar və yanğınlar baş vermişdir. Fevralın 26-sı şəhər tamamilə alova bürünmüşdür. Şəhəri yerlə yeksan etmiş erməni silahlı dəstələri və motoatıcı alayın hərbçiləri dinc əhaliyə divan tutmuşdur. Bu qırğın nəticəsində həlak olan 613 nəfərin 63-ü uşaq, 106-sı qadın, 70 nəfəri qocalar olmuşdur. Səkkiz ailə tamamilə məhv edilmişdir. Ermənilər sağ qalmış insanlara işgəncələr vermiş, başlarının dərisini soymuş, uşaqların gözlərini çıxarmışlar. Bu, insanlığa sığmayan hərəkət, vəhşilik, cinayətdir.

Yeni Azərbaycan Partiyası Yasamal rayon təşkilatının sədri, professor Fikrət İsmayılov qeyd etmişdir ki, Azərbaycanı 20 il bundan əvvəlki Azərbaycanla müqayisə etmək qeyri-mümkündür. 21 illik müstəqillik tarixinə malik olan dövlətimizin uğurlarının bir-birini əvəzləməsi harada yaşamasından asılı olmayaraq hər bir Azərbaycan vətəndaşında qürur hissi doğurmalıdır. Azərbaycan öz müstəqilliyinə nail olmaq üçün sınaqlardan uğurla çıxmış, xalqımız mərd, yenilməz olduğunu dünyaya nümayiş etdirmişdir. Azərbaycanın müstəqilliyi, ərazi bütövlüyü uğrunda mübarizə aparan oğul və qızlarımız şəhidlik zirvəsinə ucalmışlar.

F.İsmayılov Azərbaycanın diplomatik mübarizədə qazandığı uğurlardan geniş bəhs etmişdir. Bildirmişdir ki, ulu öndər Heydər Əliyevin düzgün müəyyənləşdirdiyi siyasətin Prezident İlham Əliyev tərəfindən uğurla davam etdirilməsi nəticəsində Azərbaycan həqiqətləri dünya ictimaiyyətinə çatdırılır, dövlətlər, beynəlxalq təşkilatlar haqqın, ədalətin kimin tərəfində olduğunu aydın şəkildə görür və dəyərləndirirlər. Beynəlxalq təşkilatların qərar və qətnamələrində Dağlıq Qarabağın əzəli Azərbaycan torpağı olduğu öz əksini tapmışdır. Qeyd olunmuşdur ki, birliyimizi möhkəmləndirməklə uğurlarımızın davamlılığına təmin etməliyik.

“İki sahil” qəzetinin baş redaktoru, YAP Siyasi Şurasının üzvü Vüqar Rəhimzadə bildirmişdir ki, XX əsrin ən dəhşətli faciəsi olan Xocalı soyqırımı cinayətkar erməni siyasətinin nəticəsidir. Bu gün qarşımızda duran əsas məqsəd faciənin soyqırımı olduğunu dünyaya tanıtmaqdır. Dövlətimiz bu istiqamətdə uğurlu addımlar atır.

Xocalı həqiqətlərinin dünya ictimaiyyətinə çatdırılmasında Heydər Əliyev Fondunun xidmətlərini önə çəkən V.Rəhimzadə bildirmişdir ki, Fond tərəfindən hazırlanan vəsaitlər - kitablar, albomlar, videodisklər dünyanın müxtəlif ölkələrində Xocalı soyqırımı ilə əlaqədar keçirilən tədbirlərdə təbliğat vasitəsi kimi istifadə edilir. Bu il Xocalı soyqırımı qurbanlarının xatirəsi 30-dan çox ölkədə anılacaqdır. Əminlik ifadə olunmuşdur ki, dövlətimizin uğurlu siyasəti nəticəsində vaxt gələcək soyqırımı törədən erməni cinayətkarları məhkəmə qarşısında cavab verəcəklər. Azərbaycanın işğal altında olan torpaqları azad olunacaq və soydaşlarımız öz doğma yurd-yuvalarına qayıdacaqlar.

V.Rəhimzadə Azərbaycanın 2011-ci ildə BMT Təhlükəsizlik Şurasına qeyri-daimi üzv seçilməsini Ermənistan-Azərbaycan, Dağlıq Qarabağ münaqişəsinin həllinə gedən yolda uğurlu addım kimi dəyərləndirmişdir. Azərbaycan Prezidenti İlham Əliyevin bu fikri xüsusi olaraq önə çəkilmişdir ki, hər ay və hər il bizi qələbəyə yaxınlaşdırır. Hər ay və hər il Azərbaycan daha da güclü, Ermənistan isə daha da gücsüz olur.

Çıxış edən institutun əməkdaşları da erməni vəhşiliyini təsdiqləyən faktları qeyd etmişlər. Bildirmişlər ki, Azərbaycan dövlətinin apardığı uğurlu siyasət nəticəsində erməni yalanları ifşa olunur, ermənilərin iç üzü dünyaya açılır.

Tədbirdə faciə ilə bağlı film də nümayiş etdirilmişdir.