“Neuberger Berman” şirkəti ilə əməkdaşlıq Azərbaycanda investisiya mühitinin əlverişli olmasının əyani göstəricisidir
Bakı, 25 sentyabr, AZƏRTAC
Azərbaycan Respublikasının Prezidenti İlham Əliyev ABŞ-ın Nyu-York şəhərində keçirilən BMT Baş Assambleyasının yüksəksəviyyəli həftəsi çərçivəsində “Neuberger Berman” şirkətinin sədri və baş icraçı direktoru Corc Volker ilə görüşüb.
AZƏRTAC xəbər verir ki, görüşdə dünyanın ən böyük maliyyə qurumlarından olan “Neuberger Berman” şirkəti ilə Azərbaycan arasında əməkdaşlığın cari vəziyyəti və inkişaf perspektivləri ətrafında fikir mübadiləsi aparılıb. Prezident İlham Əliyev ölkəmizin beynəlxalq maliyyə qurumları və nüfuzlu investisiya şirkətləri ilə əməkdaşlığın genişləndirilməsinə xüsusi önəm verdiyini vurğulayaraq, “Neuberger Berman” ilə tərəfdaşlığın bundan sonra da uğurla davam edəcəyinə inamını ifadə edib.
Həmçinin Azərbaycan Respublikası Dövlət Neft Fondunun 2016-cı ildən etibarən “Neuberger Berman” ilə uğurla davam edən tərəfdaşlığının ölkənin maliyyə sektorunun inkişafına və beynəlxalq investisiya imkanlarının genişlənməsinə verdiyi töhfələr xüsusi vurğulanıb.
Corc Volker “Neuberger Berman”ın qlobal maliyyə və investisiya fəaliyyətindən bəhs edərək, Azərbaycanla əməkdaşlıqdan məmnunluğunu ifadə edib. O, regionda baş verən iqtisadi proseslərin şirkət üçün əhəmiyyətini qeyd edərək, yeni layihələr çərçivəsində tərəfdaşlığın genişləndirilməsi üçün mövcud imkanların dəyərləndirildiyini bildirib.
1939-cu ildə təsis edilən “Neuberger Berman” qlobal investisiya idarəetmə şirkətidir. Hazırda şirkət beynəlxalq institutlar, məsləhətçilər və fərdi investorlar üçün 508 milyard ABŞ dolları həcmində aktivləri idarə edir. 25 ölkədə fəaliyyət göstərən şirkət “Pensions & Investments” nəşri tərəfindən 1000-dən çox əməkdaşı olan şirkətlər arasında “İnvestisiya idarəçiliyində ən yaxşı iş yeri” adına layiq görülüb və son 8 ilin hər birində birinci və ya ikinci yeri tutub.
Təbii ki, bu əməkdaşlığın kökündə bir neçə səbəb var. Onu qeyd etmək lazımdır ki, bu, bir daha Azərbaycanın investisiya yatırılması üçün cəlbedici ölkə olması, nəhəng şirkətlərin diqqətini çəkməsini göstərir. Azərbaycandakı sabitlik “Neuberger Berman” kimi yarım trilyon dollar dəyərində aktivləri idarə edən maliyyə şirkətinin Azərbaycanla əməkdaşlığa sövq edən iqtisadi sabitlik, regionda Azərbaycanın aktiv mövqeyi, həyata keçirilən islahatlar böyük rol oynayıb. Bu, bir daha Azərbaycanın qeyri-neft sektorunun inkişafında qətiyyətini, iqtisadiyyatın diversifikasiyası istiqamətində qarşıya qoyulmuş hədəflərə doğru irəliləməsinin bariz nümunəsidir. Bu əməkdaşlıq Azərbaycanda qeyri-neft sektorundan əldə edilən gəlirlərin artmasında, iqtisadiyyatın şaxələndirilməsində əhəmiyyətli rol oynayacaq.
Bölmənin digər xəbərləri
