Nicat Kazımov: Teatr cəmiyyətə təsir edən güclü mənəvi və ideoloji vasitədir
Bakı, 10 mart, AZƏRTAC
Teatrın cəmiyyətdəki rolu çox böyükdür. Bu, hər zaman belə olub və ümid edirəm ki, bundan sonra da belə qalacaq. Teatr cəmiyyətdə baş verən hadisələri, mövcud problemləri özündə əks etdirir, insanları düşündürür və bəzən həmin problemlərin həlli yollarını axtarmağa sövq edir.
Bu fikirləri AZƏRTAC-a açıqlamasında Əməkdar incəsənət xadimi, Azərbaycan Dövlət Gənc Tamaşaçılar Teatrının quruluşçu rejissoru Nicat Kazımov bildirib.
Onun sözlərinə görə, teatr təkcə istirahət məkanı deyil, eyni zamanda böyük mənəvi və ideoloji gücə malik sənət ocağıdır.
“Mədəniyyətin gücü son dərəcə böyükdür. Bu, incə, zərif, lakin olduqca təsirli bir gücdür və hər zaman öz sözünü deyir. Azərbaycanımızın zəngin tarixini, dərin mədəni ənənələrini dünyaya təqdim etmək üçün ən gözəl vasitələrdən biri məhz teatrdır”, – deyə o qeyd edib.
Nicat Kazımov Azərbaycan teatrının son illərdəki inkişafını və dünya teatrlarına inteqrasiyasını ümumilikdə yüksək qiymətləndirib.
“Dünyanın aparıcı teatrlarına nəzər salsaq, görərik ki, onların repertuarında çox güclü, maraqlı və yaddaqalan tamaşalar olduğu kimi, zəif tamaşalar da var. Bu, həyatın özünə bənzəyir - necə ki, hər gün eyni olmur, teatrda da daim yüksəlişlər və enişlər müşahidə edilir. Çünki teatr canlı sənətdir və onun təbiətində bu dinamika var”, – deyə o əlavə edib.
Gənc nəslin teatrlara cəlb olunmasından danışan aktyor bildirib ki, bu istiqamətdə daha güclü təbliğat və PR işləri aparılmalıdır.
“Gənc nəsil bəzən kitabdan oxuyub tam dərk edə bilmədiyini səhnədə gördükdə daha yaxşı anlayır və qavrayır. Hər hansı tarixi hadisəni, ictimai problemi və ya mürəkkəb mövzunu teatr vasitəsilə daha dərindən mənimsəmək mümkündür. Buna görə də hesab edirəm ki, məktəblərlə, kolleclərlə və ali təhsil müəssisələri ilə teatrların əlaqələri daha da genişləndirilməlidir”, – deyə o vurğulayıb.
Nicat Kazımovun fikrincə, teatrlar öz repertuarlarına təhsil proqramında nəzərdə tutulan əsərləri də daxil etməlidirlər. Uşaqlar və yeniyetmələr teatra erkən yaşlardan alışmalıdırlar ki, sonrakı dövrlərdə də bu sənətə maraqları davam etsin. Onun qənaətinə görə, bu istiqamətdə məqsədyönlü və sistemli iş aparılması vacibdir.
Müxbir – Günel Alıyeva
Bölmənin digər xəbərləri
