Niderland Polşaya “Patriot” hava hücumundan müdafiə sistemləri göndərəcək
Bakı, 26 sentyabr, AZƏRTAC
Niderland NATO-nun şərq cinahının müdafiəsini gücləndirmək məqsədilə Polşaya “Patriot” hava hücumundan müdafiə sistemləri göndərməyi planlaşdırır.
AZƏRTAC xəbər verir ki, Niderlandın Baş naziri Dik Sxof bu barədə “Bloomberg TV” kanalına müsahibəsində deyib. “Yaxın həftələrdə Polşaya “Patriot” sistemləri göndərəcəyik. NATO üzrə müttəfiqlərimizlə birlikdə alyansın şərq sərhədinin müdafiəsinin daha səmərəli təmin edilməsi imkanlarını müzakirə edirik”, – deyə Baş nazir vurğulayıb. Bununla belə Dik Sxof göndəriləcək sistemlərin dəqiq sayını açıqlamayıb. O, həmçinin Avropa İttifaqının 2027-ci ildən etibarən Rusiya neftinin idxalını dayandırmasının real olduğunu bildirib. Baş nazirin sözlərinə görə, ABŞ Prezidenti Donald Tramp Rusiya enerji resurslarından vaz keçmələri üçün Macarıstan və Slovakiyaya təzyiq göstərə bilər.
Qeyd edək ki, sentyabrın 10-da səhər saatlarında Polşa ordusunun operativ komandanlığı ölkənin hava məkanına daxil olmuş bir neçə PUA–nın məhv edildiyini açıqlayıb. Polşanın Baş naziri Donald Tusk sentyabrın 9-dan 10-na keçən gecə ölkəsinin hava məkanının 19 dəfə pozulduğunu deyib. Hadisədən sonra Polşanın müraciəti əsasında, NATO Şimali Atlantika Müqaviləsinin 4-cü maddəsini işə salaraq üzv ölkələr arasında məsləhətləşmələrə başlayıb.
Bölmənin digər xəbərləri
